راولپنڈی: بانی پاکستان تحریک انصاف (پی ٹی آئی) اور سابق خاتون اوّل بشریٰ بی بی کے خلاف توشہ خانہ ٹو کیس میں مزید 2 گواہوں کے بیانات قلمبند کر دیے گئے۔
اڈیالہ جیل میں توشہ خانہ ٹو کیس کی سماعت اسپیشل جج سینٹرل شاہ رخ ارجمند نے کی۔ دوران سماعت عمران خان اور بشریٰ بی بی کو کمرہ عدالت میں پیش کیا گیا۔
کیس میں مزید دو گواہوں کے بیانات قلمبند کیے گئے جبکہ مجموعی طور پر 8 گواہوں کے بیانات قلمبند کیے جا چکے ہیں۔ عدالت نے کیس کی مزید سماعت 11 جون 2025 تک ملتوی کر دی۔
یہ بھی پڑھیں: شہبازشریف نے ترک صدر سے تحفے میں ملی کار توشہ خانہ میں جمع کروا دی
گزشتہ سماعت پر جیل حکام نے عمران خان کو عدالت میں پیش کیا تھا تاہم بشریٰ بی بی نے احتجاجاً کمرہ عدالت آنے سے انکار کیا تھا۔
عدالت نے جیل حکام کو بشریٰ بی بی کو لانے کی ہدایات جاری کیں تو جیل حکام نے بتایا کہ بشریٰ بی بی نے کمرہ عدالت آنے سے انکار کر دیا، ملزمہ کا مؤقف ہے منگل کو عمران خان سے ملاقات نہیں کروائی گئی۔
سماعت کیلیے ساڑھے 3 گھنٹے تک انتظار کیا مگر بشریٰ بی بی نہ آئیں۔ ملزمہ کی عدم دستیابی کے باعث 4 گواہوں کے بیان ریکارڈ نہ ہو سکے۔
جج نے بشریٰ بی بی کے کمرہ عدالت نہ آنے پر برہمی کا اظہار کرتے ہوئے کہا کہ ملزمہ کو ایک موقع دیا جا رہا ہے، وہ آئندہ سماعت پر نہ آئیں تو کیس میں ضمانت منسوخی کے احکامات جاری کیے جائیں گے۔
دوران سماعت پراسیکیوشن نے توشہ خانہ ٹو کیس میں بشریٰ بی بی کی ضمانت منسوخ کرنے پر اصرار کرتے ہوئے کہا کہ عدالت اختیارات استعمال کرتے ہوئے ملزمہ کے بغیر ہی کیس آگے بڑھائے۔
توشہ خانہ ٹو کیس کیا ہے؟
عمران خان اور بشریٰ بی بی کے خلاف توشہ خانہ ٹو کیس سعودی ولی عہد محمد بن سلمان کی جانب سے دیے گئے بلغاری جیولری سیٹ پر دائر کیا گیا تھا۔
ریفرنس میں کہا گیا تھا کہ بشریٰ بی بی کو بلغاری جیولری سیٹ 7 سے 10 مئی 2021 کے دورہ سعودی عرب پردیاگیا، جیولری سیٹ میں ایک انگوٹھی ، بریسلٹ ، نیکلس ، ایک جوڑی بالیاں شامل ہیں۔
ریفرنس میں بتایا گیا تھا کہ شواہدکےمطابق بانی پی ٹی آئی اور اہلیہ نے غیر قانونی طور پر بلغاری جیولری سیٹ اپنے پاس رکھا، ڈپٹی ایم ایس نے 18 مئی 2021 کوایس او توشہ خانہ کو قیمت کا تخمینہ لگانے کے بارے میں آگاہ کیا، سیکشن افسر توشہ خانہ کو ڈکلیئر کرنے کے بارے میں آگاہ کیا گیا لیکن سیٹ جمع نہیں کرایا گیا۔
ریفرنس میں کہنا تھا کہ بلغاری کمپنی نے فرنچائز سالوجنٹ ٹریڈنگ سعودی عرب کو ہار، بالیاں فروخت کی تھیں، 25 مئی 2018 کو ہار 3 لاکھ یورو، بالیاں 80 ہزار یورو میں فروخت کی گئی تھیں تاہم کمپنی سے بریسلٹ اورانگوٹھی کی قیمت کے بارے میں معلومات نہیں مل سکیں۔
ریفرنس کے مطابق بلغاری جیولری سیٹ کی ٹوٹل قمیت تقریباً 7 کروڑ 56 لاکھ 61 ہزار 600 پاکستانی روپے بنتی ہے، جیولری سیٹ میں شامل ہار کی قیمت 5 کروڑ 64 لاکھ 96 ہزار روپے بنتی ہے جبکہ جیولری سیٹ میں شامل بالیوں کی قیمت 1 کروڑ 50 لاکھ 65 ہزار 600 روپے بنتی ہے۔
نیب کا کہنا تھا کہ توشہ خانہ رولز کے مطابق 50 فیصد دے کرسیٹ کی قیمت 3 کروڑ 57 لاکھ 65 ہزار 800 روپے بنتی ہے، جیولری سیٹ کی کم قیمت لگوا کر قومی خزانے کو 3 کروڑ 28 لاکھ 51 ہزار 300 روپے کا نقصان پہنچایا گیا۔
ریفرنس میں مزید کہا گیا تھا کہ بانی پی ٹی آئی نے اہلیہ سے ملکرنیب آرڈیننس 1999 کی سیکشن 9، سب سیکشن 3 ،4،6 اور 12 کی خلاف ورزی کی ، یکم اگست 2022 کو بورڈ میٹنگ کے بعد چیئرمین نیب کی ہدایت پرانکوائری شروع ہوئی، بانی پی ٹی آئی اوربشریٰ بی بی نے اپنے اختیارات کا نا جائز استعمال کیا، بانی پی ٹی آئی نے وزارت عظمیٰ کے دور میں 108 تحائف میں سے 58 اپنے پاس رکھے۔
