اسلام آباد: توشہ خانہ کیس 2 میں عدالت نے بانی پی ٹی آئی اور اہلیہ بشریٰ بی بی کی بریت کی درخواستوں پر سماعت کا تحریری حکم جاری کر دیا۔
اسلام آباد ہائیکورٹ نے توشہ خانہ کیس 2 میں پی ٹی آئی بانی اور بشریٰ بی بی کی بریت کی درخواستوں پر ایف آئی اے کو پری ایڈمیشن نوٹس جاری کر دیا۔
عدالت نے 28 جنوری کے لیے ایف آئی اے کو نوٹس جاری کیا ہے، ٹرائل روکنے کے حکم امتناع کی درخواست پر بھی ایف آئی اے کو نوٹس جاری کیا گیا ہے۔
جسٹس انعام امین منہاس نے 2 صفحات کا تحریری حکم نامہ جاری کیا، جس میں کہا گیا ہے کہ درخواست گزار کا مؤقف ہے کہ ان کے خلاف کیس نہیں بنتا، اس لیے بری کیا جائے، بانی کے وکیل کا کہنا ہے کہ 5 وعدہ معاف گواہوں پر پراسیکیوشن کا کیس نہیں بنتا۔
توشہ خانہ کیس : آصف زرداری اور نواز شریف بڑی مشکل میں پھنس گئے
حکم نامہ کے مطابق وکیل کا کہنا ہے کہ ٹرائل کورٹ تیزی سے ٹرائل آگے بڑھا رہی ہے، وکیل کے مطابق ٹرائل تیزی سے بڑھانے سے بنیادی حقوق متاثر ہو سکتے ہیں، اور یہ کہ عدالت نے بغیر لیگل مائنڈ اپلائی کیے درخواستیں مسترد کر دیں تھیں۔
عدالت نے اپنے فیصلے میں کہا کہ ایف آئی اے کو پری ایڈمیشن نوٹس سمیت ٹرائل روکنے کے حکم امتناع کی درخواست پر بھی نوٹس جاری کیا جاتا ہے۔
