اسلام آباد : اسلام آباد ہائی کورٹ نے توشہ خانہ کے نئے ریفرنس میں گرفتاری کیخلاف بانی پی ٹی آئی اور اہلیہ بشریٰ بی بی کی درخواستیں مسترد کردیں۔
تفصیلات کے مطابق اسلام آبادہائی کورٹ نے توشہ خانہ ٹوکیس میں گرفتاری کیخلاف بانی پی ٹی آئی اوراہلیہ کی درخواستوں پر سماعت ہوئی۔
نیب پراسیکیوٹر نے کہا توشہ خانہ ریفرنس فائل ہو چکا ہے، اب ان کے پاس ضمانت بعد از گرفتاری دائر کرنے کا اختیار ہے۔
جس پر سلمان صفدر ایڈو کیٹ نے کہا جب عدالت کے سامنے بنیادی حقوق کے سوال موجود تھے پھر کیسے یہ ریفرنس دائر کر سکتے تھےاعتراض کیا گیا کہ ہم تفتیش میں شامل نہیں ہوئے ،مگر اب ہم شامل تفتیش ہو گئے۔
عدالت کے استفسار پر نیب کے تفتیشی افسر نے کہاہم جیل گئے تھے سوال نامے کا جواب مل گیا ہے، جس پر جسٹس میاں گل حسن اورنگزیب نے کہا نیب نے جواب حاصل کرنے اورتفتیش مکمل ہونے کے بعد ریفرنس دائر کر دیا ہے۔
عدالت نے توشہ خانہ کے نئے ریفرنس میں گرفتاری کیخلاف بانی پی ٹی آئی اور اہلیہ بشریٰ بی بی کی درخواستیں غیر مؤثر قرار دیتے ہوئے مسترد کردیں۔
جسٹس میاں گل حسن اورنگزیب اورجسٹس بابرستارنےاحکامات جاری کردیئے۔
