رمضان المبارک کے آخری عشرے میں سعودی وزارت سیاحت کی جانب سے سیاحتی سروسز فراہم کرنے والے اداروں کی نگرانی کا کام تیز کردیا گیا ہے۔
خبررساں ادارے ایس پی اے کی رپورٹ میں کہا گیا ہے کہ سعودی وزیر سیاحت احمد بن عقیل الخطیب نے وزارت کی ٹیموں کو ہدایت کی تھی کہ زائرین کو رہائشی ہوٹلز اورفراہم کی جانے والی دیگر خدمات کے حوالے سے شکایات اور خلاف ورزیوں کا فوری تدارک کیا جائے۔
وزارت کی ٹیموں کی جانب سے مکہ مکرمہ کے مختلف علاقوں میں رہائشی ہوٹلز اور سیاحتی اداروں کے 900 دورے کیے گئے جہاں 160 خلاف ورزیاں ریکارڈ کی گئیں۔
سیاحتی کمیٹی کی ٹیموں کی جانب سے مدینہ منورہ کے مختلف علاقوں میں 210 دورے کیے گئے جن میں 60 خلاف ورزیاں ریکارڈ کی گئیں۔مدینہ منورہ میں ناقص خدمات کی فراہمی پر 54 جبکہ 6 تجارتی اداروں پر لائسنس کی خلاف ورزی درج کی گئیں۔
تفتیشی کمیٹیوں کی جانب سے ریکارڈ کی جانے والی 160 میں سے 140 خلاف ورزیاں زائرین کو فراہم کی جانے والی سروسز سے متعلق تھیں جبکہ 24 اداروں پر بغیر لائسنس سیاحتی سروسز فراہم کرنے کی خلاف ورزی درج کی گئی۔
وزارت کے ذرائع کا کہنا تھا مکہ مکرمہ اور مدینہ منورہ میں تفتیشی ٹیمیں 24 گھنٹے کی بنیاد پر دورے کیا کرتی ہیں تاکہ آنے والے زائرین کی شکایات کو حل کیا جاسکے۔
مدینہ بس سروس سے رمضان میں 5 لاکھ سے زائد زائرین مستفید ہوئے
تفتیشی ٹیموں کو رمضان المبارک کے آغاز سے اب تک مکہ مکرمہ میں زائرین کی جانب سے 1060 شکایات ملیں، اس کے علاوہ مدینہ منورہ میں موصول ہونے والی شکایات کی تعداد 220 تھی۔
