بیجنگ : چینی ماہرین نے ایک ایسا قلم تیار کیا ہے جو کھانے میں زہر اور زہریلی گیس کی شناخت کرسکے گا، اس قلم کی خصوصیت یہ بھی ہے کہ مضر کیمیکل کی انتہائی معمولی مقدار بھی نوٹ کرسکتا ہے۔
غیر ملکی خبر رساں ادارے کے مطابق چین نے ایک ایسا قلم تیار کیا ہے جو باسی کھانے، پھل، سبزیوں کی شناخت کرکے انسانی جان کو بچانے میں اہم کردار ادا کرسکتا ہے اس کے علاوہ یہ قلم زہریلی گیس کی بھی شناخت کرےگا۔
مذکورہ قلم کی نب زہریلے کھانے اور گیس کی موجودگی پر اپنا رنگ بدل لیتی ہے، جس کی موجودگی کی پیشگی اطلاع پر کسی بڑے حادثے سے بچا جاسکتا ہے۔
یاد رہے کہ جنگوں یا حملوں میں اکثر زہریلی گیس استعمال کی جاتی ہے جس کی بو اور رنگت نہیں ہوتی، اسی طرح کھانے پینے کی بہت سی اشیاء خراب ہونے پر گیس کے بخارات خارج کرتی ہیں جنہیں ہم سونگھ نہیں سکتے۔
اس قلم کو چین میں شینزن انسٹی ٹیوٹ آف ایڈوانسڈ اسٹڈیز نے کئی اداروں کے تعاون سے تیار کیا ہے۔ اس کا اولین نمونہ (پروٹوٹائپ) دیکھنے میں سرنج کی طرح لگتا ہے اور بہت کم خرچ اور مؤثر بھی ہے۔ یہ اپنے خواص کی بنا پر مضر کیمیکل کی انتہائی معمولی مقدار بھی نوٹ کرسکتا ہے۔
اس طرح کے سینسر عام طور پر ایگریگیشن انڈیوسڈ ایمیشن فلوروجین (ایل ای جینس) استعمال کرتے ہیں اور مضر کیمیکل ان سے چپکنے کے بعد ایک طرح کی رنگ دار روشنی خارج کرنے لگتے ہیں لیکن اب سے قبل یہ سارے نظام مائعات (لیکوئیڈ) پر مبنی تھے۔
اب ژی جیاؤ، پینگفانگ زینگ، ہیاتو فینگ، بین زونگ ٹینگ اور دیگر ساتھیوں نے ایل ای جینس کو ٹھوس شکل دی ہے اور اسے ایک سوئی کی نوک پر لگایا ہے۔ جیسے ہی کوئی گیس خارج ہوتی ہے یا کسی غذا کے سڑنے سے بخارات نکلتے ہیں اس کا سرا روشن ہوجاتا ہے۔
