ٹویوٹا موٹر کارپوریشن نے اعلان کیا ہے کہ وہ سنہ 2030 تک 35 لاکھ الیکٹرک گاڑیاں فروخت کریں گے، یہ قدم الیکٹرک گاڑیوں کی طرف منتقلی کے رجحان کو دیکھتے ہوئے کیا جارہا ہے۔
بین الاقوامی ویب سائٹ کے مطابق ٹویوٹا موٹرز نے بجلی سے چلنے والی گاڑیوں، ای وی کی جانب منتقلی کے عالمی رجحان کے تناظر میں سنہ 2030 تک 35 لاکھ ای وی گاڑیاں فروخت کرنے کا منصوبہ بنایا ہے۔
ٹویوٹا کے صدر تویودا آکیو نے ای وی سے متعلق نئی حکمت عملی کا اعلان منگل کے روز ٹوکیو میں کیا۔
اس منصوبے کے تحت سنہ 2030 تک ٹویوٹا ای وی کے 30 ماڈل پیش کرے گا اور اسی سال مجموعی طور پر 35 لاکھ نئی ای وی گاڑیاں فروخت کرے گا۔ کمپنی کا کہنا ہے کہ شمالی امریکا، یورپ اور چین میں فروخت کی جانے والی بیش قیمت لیکسس گاڑیوں کے تمام ماڈل بجلی سے چلنے والے ہوں گے۔
اس سے پہلے کمپنی نے دنیا بھر میں مجموعی طور پر 20 لاکھ ای وی گاڑیاں اور فیول سیل گاڑیاں فروخت کرنے کے منصوبے کا اعلان کیا تھا۔
ان نئے مقرر کردہ اہداف سے نشاندہی ہوتی ہے کہ ٹویوٹا میں ای وی گاڑیاں بنانے کی جانب واضح تبدیلی آئی ہے۔
ٹویوٹا نے بیٹری کی تیاری میں سرمایہ کاری کو بڑھا کر 2030 تک 20 کھرب ین یا تقریباً 18 ارب ڈالر کرنے کا بھی اعلان کیا ہے۔
