کراچی : سندھ کابینہ کے اجلاس میں ٹریفک قوانین کے لیے نیا قانونی ترمیمی مسودہ تیار کرنے کی منظوری دے دی گئی۔ ٹریفک قوانین کی خلاف ورزی پر جرمانہ ڈبل کرنے کا فیصلہ کرلیا گیا۔

تفصیلات کے مطابق کراچی میں سندھ کابینہ کا اجلاس وزیراعلیٰ سندھ سید مراد علی شاہ کی زیر صدارت منعقد ہوا، اجلاس میں ٹریفک قانون کیلئے نیا قانونی ترمیمی مسودہ تیار کرنے کی منظوری دے دی گئی۔ سندھ حکومت نے نیا ٹریفک قانون لانے کا فیصلہ کرلیا۔

ٹریفک قوانین کی خلاف ورزی اور بغیر لائسنس گاڑی چلانے پر جرمانہ ڈبل کرنے کی تجویز دی گئی ہے۔ سگنل توڑنے پر جرمانہ ڈیڑھ سو روپے سے بڑھا کرایک ہزاراور لائسنس منسوخ کردیا جائے گا۔

اجلاس سے خطاب کرتے ہوئے سید مراد علی شاہ کہا کہ دیگر ممالک میں لائسنس کا حصول انتہائی مشکل ہے جبکہ ہمارے ملک میں ڈرائیونگ لائسنس کا اجراء اسکول میں داخلے سے بھی زیادہ آسان ہے۔

انہوں نے کہا کہ والدین سمیت ہم سب کو ایسی روش کو ختم کرنا ہوگی اور ٹریفک حادثات میں کمی کیلئے لائسنس اجراء کے قوانین میں سختی کرنا ہوگی،

سندھ کابینہ کے اجلاس میں دنیا کے دیگر ممالک کی طرح ہر شہری کیلئے ڈرائیورنگ لائسنس لازمی قرار دینے کی تجویز دے دی گئی۔ اجلاس میں بتایا گیا کہ موٹر سائیکل بنانے والی کمپنیاں لازمی طور پر موٹر سائیکل کے ساتھ ہیلمٹ دینے کی بھی پابند ہوں گی۔

اجلاس میں موٹر سائیکل کی ون ویلنگ کو روکنے کے لیے سخت اقدامات کرنےکا فیصلہ کر لیا گیا، موٹر سائیکل پر سفر کرنے والی خواتین اور بچوں کو ہیلمٹ پہن کر سفر کرنے سے فی الحال مستثنی قرار دیا گیا ہے۔

علاوہ ازیں ڈی آئی جی ٹریفک امیر شیخ نے تجویز پیش کی ہے کہ ہیلمٹ پہننے کی ہدایات پر عمل نہ کرنے والوں پر جرمانے کی رقم 150 روپے سے بڑھا کر ایک ہزار روپے کی جائے۔

کراچی میں میڈیا سے بات چیت کرتے ہوئے ڈی آئی جی ٹریفک نے بتایا کہ اگر موٹر سائیکل سوار نے ہیلمٹ نہ پہنا ہو تو ایک ہزار روپے اور پیچھے بیٹھنے والے کو ہیلمٹ نہ پہننے پر 500 روپے جرمانے کی تجویز دی گئی ہے۔

دریں اثناء وزیر اعلیٰ سندھ سید مراد علی شاہ کے احکامات کے تناظر میں آئی جی سندھ اے ڈی خواجہ نے ڈی آئی جی ہیڈ کوارٹرز سندھ کو ہدایات جاری کی ہیں کہ موٹر سائیکل سواروں میں ہیلمٹ کے استعمال کے حوالے سے شعور اجاگر مہم کے آغاز کو صوبائی سطح پر یقینی بنایا جائے تاکہ ممکنہ حادثات کی صورت میں موٹرسائیکل سواروں کو سر پر لگنے والی شدید ضرب سے محفوظ رکھا جاسکے۔

اسی سے متعلق : شاہراہ فیصل پر ہیوی ٹریفک رات 11 بجے تک ممنوع رہے گی

دوسری جانب موٹرسائیکل سواروں کو ہیلمٹ کی پابندی کے حوالے سے مشیر اطلاعات مولا بخش چانڈیو نے کہا ہے کہ بغیرہیلمٹ والے موٹرسائیکل سواروں کوگرفتار کیا جائے گا۔