نئی دہلی: کلکتہ میں جونیئر ٹرینی ڈاکٹر کے ساتھ جنسی زیادتی اور قتل کے مرکزی ملزم سنجے رائے نے جیل میں انوکھی فرمائش کرکے جیل حکام کو حیرانی میں مبتلا کردیا۔
بین الاقوامی خبر رساں ادارے کی رپورٹ کے مطابق جیل حکام نے بتایا کہ مرکزی ملزم سنجے رائے نے جیل میں لذیذ کھانوں کی فرمائش کردی جبکہ سادہ کھانا کھانے سے انکار کردیا۔
جیل ذرائع کا کہنا ہے کہ جیل حکام نے جب سنجے رائے کو روٹی اور سبزی کھانے کے لئے دی تو اس نے کہا کہ مجھے سبزی روٹی جیسا سادہ کھانا نہیں کھانا، ملزم نے کہا کہ مجھے چاؤمین کھانے میں دیا جائے۔
میڈیا رپورٹ کے مطابق جیل قوانین کے تحت جیل میں تمام قیدیوں کیلئے ایک ہی کھانا تیار ہوتا ہے اور سب قیدی وہی کھاتے ہیں لہٰذا مرکزی ملزم سنجے رائے کی خواہش پوری نہ ہوسکی۔
اس سے قبل کلکتہ کے آر جی کار میڈیکل کالج اسپتال کے سابق پرنسپل سندیب گھوش کو سینٹرل بیورو آف انویسٹی گیشن (سی بی آئی) نے کرپشن کے الزام میں حراست میں لیا ہے۔
31 سالہ پوسٹ گریجویٹ ٹرینی ڈاکٹر کے ساتھ 9 اگست 2024 کو آر جی کار میڈیکل کالج اسپتال میں زیادتی اور قتل کا واقعہ پیش آیا تھا، جس کے بعد سندیپ گھوش مستعفی ہوگئے تھے۔
سی بی آئی کی جانب سے آر جی کار میڈیکل کالج کے سابق پرنسپل سندیپ گھوش سے ڈاکٹر کے ساتھ زیادتی اور قتل کے واقعے کے بعد پوچھ گچھ شروع کردی گئی تھی۔
اسی دوران ان پر مالی بد عنوانیوں کے الزامات بھی سامنے آئے تھے، جس کی ایف آئی آر بھی درج کرلی گئی تھی، تاہم آج سی بی آئی نے سابق پرنسپل سندیب گھوش کو گرفتار کرلیا ہے۔
سعودی عرب: مصری خاتون کو ملک سے بیدخل کرنے کا حکم، وجہ سامنے آگئی
بھارتی میڈیا کا کہنا ہے کہ سی بی آئی کے آفس میں سندیپ گھوش کو خاتون ڈاکٹر کے ساتھ زیادتی اور قتل کے معاملے پر تحقیقات کرنے کے لئے بلایا گیا تھا، بعد میں انہیں کلکتہ میں واقع سی بی آئی کے نظام پیلس آفس منتقل کیا گیا، جہاں انہیں گرفتار کر لیا گیا۔
