بھارتی ریاست مغربی بنگال کے شہر کولکتہ میں ٹرینی ڈاکٹر سے زیادتی و قتل کا افسوسناک واقعہ ہوا تھا، تحقیقاتی ایجنسیوں نے سابق پرنسپل ڈاکٹر سندیب گھوش سے بھی تحقیقات شروع کردی ہیں۔
غیر ملکی ذرائع ابلاغ کے مطابق سینٹرل بیورو آف انویسٹیگیشن (سی بی آئی) کی جانب سے آر جی کار اسپتال کے سابق پرنسپل ڈاکٹر سندیپ گھوش سے تحقیقات شروع کردی گئی ہیں، ان کا پولی گراف ٹیسٹ بھی کیا گیا ہے۔
رپورٹ میں انکشاف ہوا ہے کہ ڈاکٹر سندیپ گھوش اس بات کی وضاحت کرنے میں مصروف ہیں کہ اسپتال کے حکام نے مقتولہ کے والدین کو گمراہ کرنے کی کوشش کیوں کی۔ سی بی آئی کی جانب سے اس بات کی تحقیق کی جارہی ہیں کہ اسپتال کے پرنسپل کو جرم کے بارے میں 30 منٹ دیر سے کیوں آگاہ کیا گیا۔
حکام کی جانب سے اس واقعے کے بارے میں پرنسپل کو مطلع کرنے سے قبل مقتولہ کے والدین کو فون کیا گیا اور کہا گیا کہ ان کی بیٹی نے خودکشی کر لی ہے۔
اس بات کی بھی تحقیقات کی جارہی ہیں کہ اگر ڈاکٹر گھوش کو اس جرم کے بارے میں کوئی علم نہیں تھا، تو ان کے معاونین اسپتال کے سیمینار ہال میں کیوں موجود تھے۔
رپورٹ کے مطابق ڈاکٹر سندیپ گھوش کو 9 اگست کی صبح 10 بجکر 20 منٹ پر اس واقعے کا علم ہوا، جبکہ ٹرینی ڈاکٹر کی لاش صبح 9 بجکر 30 منٹ ملی تھی۔ پولیس کو 10 بج کر 10 منٹ پر اطلاع دی گئی تھی۔
ڈاکٹر سندیپ گھوش کا کہنا تھا کہ انہیں صبح 10 بجے ایک ایسوسی ایٹ پروفیسر سمیت رائے تاپدار کی کال آئی تھی لیکن وہ اس وقت واش روم میں تھے اور کال وصول نہیں کرپائے تھے۔
بیوی کو منشیات کیس میں پھنسانے کی کوشش شوہر کو مہنگی پڑ گئی
انہوں نے بتایا کہ جب میں نے واپس کال کی تو مجھے 10 بج کر 20 منٹ پر اس واقعے کے بارے میں علم ہوا اور میں 11 بجے اپنے آفس پہنچ گیا تھا۔
یاد رہے کہ 9 اگست کی صبح ٹرینی ڈاکٹر کی لاش سیمینار ہال سے ملی تھی،جہاں وہ 36 گھنٹے کی ڈیوٹی کرنے کے بعد سونے کےلیے گئی تھی۔
