اسلام آباد: ایڈووکیٹ جنرل نے اہل کاروں کے تبادلے رکوا دیے۔
ذرائع کے مطابق ایڈووکیٹ جنرل آفس کی سیکیورٹی پر مامور اہل کاروں کے تبادلے ایڈووکیٹ جنرل نے رکوا دیے، انھوں نے کسی بھی اہل کار، نائب کورٹ کو تا حکم ثانی جانے سے روک دیا۔
ذرائع کا کہنا ہے کہ ایڈووکیٹ جنرل کے تمام اسٹاف کو معمول کے مطابق کام کرنے کی ہدایت کی گئی ہے، اس صورت حال میں ایڈووکیٹ جنرل آفس کے لا افسران گومگو کا شکار ہو گئے ہیں۔
نگران حکومت نے پرانے لا افسران کو عدالتوں میں پیش ہونے سے روک رکھا ہے، اور عدالتیں الاٹ نہ ہونے سے نئے لا افسران بھی پیش نہیں ہو رہے ہیں۔
دوسری جانب عدالتوں کی جانب سے لا افسران کے پیش نہ ہونے پر برہمی کا اظہار کیا گیا ہے، جسٹس شاہد کریم نے لا افسران کی عدم پیشی پر نوٹس لے کر معاملہ حل کرنے کا حکم دیا تھا۔
واضح رہے کہ نگران حکومت نے ایڈووکیٹ جنرل، پرانے لا افسران کو ہٹا کر نئی تعیناتیاں کی تھیں، جب کہ ہائی کورٹ نے برطرفیوں کا حکم معطل کر رکھا ہے۔
