کراچی : سندھ حکومت نے وفاق کے احکامات نہ ماننے کا فیصلہ کرتے ہوئے سندھ پولیس کے افسران کو کام جاری رکھنے کی ہدایت کردی ، وفاقی حکومت نے روٹیشن پالیسی کے تحت افسران کا تبادلہ کیا تھا۔
تفصیلات کے مطابق سندھ حکومت نے روٹیشن پالیسی کے تحت سندھ پولیس کے افسران کے تبادلے پر وفاق کے احکامات نہ ماننے کا فیصلہ کرلیا اور تبدیل ہونے والے گریڈ 20 کے افسران کو چارج نہ چھوڑنے کا حکم دیتے ہوئے ہدایت کی کہ افسران اپنے عہدوں پر کام جاری رکھیں۔
وفاقی حکومت نےروٹیشن پالیسی کے تحت افسران کا سندھ سے تبادلہ کیا گیا تھا، ذرائع کا کہنا ہے کہ افسران میں قمر الزمان، فدا مستوئی، منیر شیخ جونئیر ، ڈی آئی جی عرفان بلوچ اور اقبال دارا شامل ہیں۔
ذرائع کے مطابق عرفان بلوچ کا تبادلہ اسلام آباد، منیر شیخ جونیئر کا تبادلہ پنجاب ، فدا حسین مستوئی کا تبادلہ موٹروے پولیس ، قمر زمان کا تبادلہ پنجاب جبکہ ڈی آئی جی اقبال دارا کا تبادلہ بھی پنجاب کیا گیا۔
ذرائع نے کہا ہے کہ روٹین پالیسی کے علاوہ بھی افسران کو لسٹ کے مطابق منتخب نہیں کیا گیا، پسند نا پسند کی بنیاد پر افسران کے نام منتخب کیے گئے، لسٹ میں پہلے نمبر کو چھوڑ کر آگے کے نمبروں پر افسران کے نام دیے گئے۔
ذرائع کے مطابق سندھ حکومت کی جانب سے بھی بھیجے گئے ناموں پر ناراضی کا اظہار کیا ، اس سلسلے میں وزیراعلی سندھ نے چیف سیکریٹری سے وفاق کو خط لکھنے کی ہدایت کردی ہے۔
