نیشنل ہائی وے اتھارٹی حکام نے موٹر ویز پر سفر کرنے والے تمام شہریوں کو خبر دار کیا ہے کہ نئے سال سے موٹر وے قوانین پر عمل درآمد نہ کرنے والے گاڑی مالکان کا داخلہ ممکن نہیں ہوسکے گا۔
نیشنل ہائی وے اتھارٹی نے اعلان کیا ہے کہ موٹر ویز پر ایم ٹیگ لازمی قرار دے دیا گیا ہے، جس پر تمام گاڑی مالکان کو اس کی پابندی کرنا لازمی ہے۔
حکام کا کہنا ہے کہ موٹروے پر بغیر ایم ٹیگ کے سفر کرنے والی گاڑیاں31 دسمبر تک ایم ٹیگ لگوا لیں بصورت دیگر موٹر وے پر نہ صرف داخلہ ممنوع ہوگا بلکہ ان پر جرمانہ بھی عائد کیا جائے گا۔
نیشنل ہائی وے اتھارٹی حکام کے مطابق یکم جنوری2024سے موٹرویز پر بغیر ایم ٹیگ گاڑیوں کا سختی سے داخلہ ممنوع ہوگا۔
تیز رفتاری سے گریز کریں! pic.twitter.com/l80L8cytEb
— National Highways & Motorway Police (NHMP) (@NHMPofficial) November 6, 2023
حکام کے مطابق اسلام آباد ٹو پشاور موٹروے ایم ون، لاہور ٹو عبدالحکیم موٹر وے ایم تھری، پنڈی بھٹیاں ٹو ملتان موٹروے ایم فور، ملتان ٹوسکھر موٹر وے ایم فائیو شامل ہیں اس کے علاوہ ہکلہ ٹو ڈیرہ اسماعیل خان ایم چودہ، حسن ابدال ٹو مانسہرہ ایکسپریس وے ای35 بھی شامل ہے۔
واضح رہے کہ اسلام آباد سے لاہور ایم ٹو موٹر وے سے روزانہ تقریباً سوا لاکھ گاڑیاں گزرتی ہیں، ٹول پلازہ پر جن گاڑیوں کو ایم ٹیگ لگا ہوتا ہے وہ باآسانی چند لمحوں میں نکل جاتی ہیں جس کی وجہ سے رش سے بچا جاسکتا ہے اور وقت کی بچت ہوتی ہے۔
ذرائع کے مطابق پہلے ایم ٹیگ لگوانے کے لیے شناختی کارڈ کافی تھا مگر اب اس کے ساتھ گاڑی کا رجسٹریشن اسمارٹ کارڈ ہونا بھی لازمی ہے ورنہ ٹیگ نہیں لگے گا۔ ون نیٹ ورک ایپ کی مدد سے آپ اپنا ایم ٹیگ ری چارج بھی کرسکیں گے۔
