پاکستان میں ہونے والی ٹرائی نیشن سیریز کے پہلے میچ میں آج پاکستان اور نیوزی لینڈ آمنے سامنے ہوں گے، سیریز میں 3 ٹیمیں حصہ لے رہی ہیں۔
پاکستان اور نیوزی لینڈ کے درمیان پہلا میچ آج لاہور میں ہوگا، تینوں کپتانوں کے ہمراہ ٹرافی کی رونمائی بھی کردی گئی ہے۔
ٹرائی نیشن سیریز کے پہلے میچ سے قبل لاہور میں نیوزی لینڈ کی ٹیم نے پریکٹس سیشن میں حصہ لیا، جبکہ کپتان مچل سینٹنر نے ٹرافی کے ہمراہ تصویر بنوائی۔
مہمان ٹیم کے کپتان کا اس موقع پر کہنا تھا کہ چیمپینز ٹرافی سے قبل تین ملکی سیریز اہم ہے۔ پہلی بار لاہور آئے ہیں، قذافی اسٹیڈیم بہت خوب صورت لگا۔
اس سے قبل قومی ٹیم کے سابق کپتان راشد لطیف کا کہنا تھا کہ صائم ایوب کی وجہ سے ہمیں دو کھلاڑی ٹیم میں لانے پڑے جس سے نقصان ہوا ہے۔
نجی ٹی وی سے گفتگو کرتے ہوئے سابق کپتان راشد لطیف نے کہا کہ صائم ایوب کی جگہ ہمیں ایک اوپنر اور ایک بولرز شامل کرنا پڑا ہے جس سے نقصان ہوا ہے۔
انہوں نے کہا کہ صائم ایوب نے آخری ون ڈے میں پانچ اوورز کیے تھے جس میں وکٹ بھی لی تھی۔
صائم ایوب کی انجری کے بعد یہ خبریں بھی سامنے آرہی ہیں کہ اب چیمپئنز ٹرافی میں فخر زمان کے ساتھ بابر اعظم اوپننگ کرسکتے ہیں۔
واضح رہے کہ پاکستان کے نوجوان باصلاحیت اوپنر صائم ایوب جو گزشتہ ماہ جنوری میں جنوبی افریقہ کیخلاف کیپ ٹاؤن ٹیسٹ میچ میں ٹخنے کی انجری کے باعث چیمپئنز ٹرافی میں شرکت سے محروم ہوگئے اور اس وقت لندن میں زیر علاج ہیں۔
دو روز قبل ان کی صحتیابی اور کرکٹ کے میدانوں میں واپسی سے متعلق پاکستان کرکٹ بورڈ نے اپ ڈیٹ رپورٹ جاری کی۔
چیمپئنز ٹرافی کے لیے پاکستان ٹیم کی جرسی کی رونمائی
پی سی بی کے مطابق صائم ایوب 10 ہفتوں کے لیے کرکٹ سے باہر رہیں گے۔ ان کے ایم آر آئی اسکین، ایکسرے اور میڈیکل رپورٹس کے بعد ڈاکٹروں نے انہیں 10 ہفتوں تک آرام کا مشورہ دیا ہے۔
