اسلام آباد : سپریم کورٹ میں سویلینز کے فوجی عدالتوں میں ٹرائل کیخلاف کیس میں فل کورٹ تشکیل دینے کی ایک اور درخواست دائر کردی گئی۔
تفصیلات کے مطابق سویلینز کے فوجی عدالتوں میں ٹرائل کیخلاف کیس میں فل کورٹ تشکیل دینے کی ایک اور درخواست دائر کردی گئی۔
درخواست گزار کرامت علی کے وکیل فیصل صدیقی نے سپریم کورٹ میں درخواست دائر کی، جس میں مؤقف اختیار کیا گیا کہ سویلینز کے فوجی عدالتوں میں ٹرائل کاکیس مفاد عامہ کا ہے، ماضی میں بھی فوجی ٹرائل سے متعلق کیس 9ممبرزبینچ یافل کورٹ نے ہی سنا۔
درخواست میں کہا گیا کہ وفاقی حکومت نے بھی فل کورٹ بنانے کی استدعا کی جس کو مسترد کیاگیا، حکومت کے کئی وزرا بھی موجودہ بینچ پر تنقید کر چکے، بینچ کے رکن جسٹس یحیی آفریدی بھی فل کورٹ بنانے کا کہہ چکے ہیں۔
درخواست گزار کا کہنا تھا کہ ضروری نہیں کہ تمام ججز پر مشتمل ہی فل کورٹ ہو، چیف جسٹس دستیاب ججز پر مشتمل فل کورٹ بنا کر کیس سنیں۔
درخواست میں کہا گیا کہ اٹارنی جنرل پہلے ہی یقین دہانی کرا چکے کسی سویلین کا ٹرائل شروع نہیں ہوا، فل کورٹ کا فیصلہ آنے سے سویلینز کافوجی عدالت میں ٹرائل کامعاملہ ایک ہی بارحل ہوگا۔
