ٹوبہ ٹیک سنگ : گوجرہ میں سیمنٹ سے لدا ٹرک مہندی کی تقریب میں جا گھسا، حادثے میں 4 خواتین جاں بحق اور 8 افراد شدید زخمی ہوگئے۔
تفصیلات کے مطابق ٹوبہ ٹیک سنگھ میں گوجرہ جھنگ روڈ پر مہندی کی تقریب میں شریک افراد پر سیمنٹ سے بھرا ٹرک چڑھ گیا، حادثے میں چار خواتین جاں بحق اور آٹھ افراد زخمی ہو گئے۔
ریسکیو ذرائع نے بتایا کہ جاں بحق ہونے والی خواتین میں یاسمین، عاصمہ، نمرہ اور نشا شامل ہیں ، حادثے میں زخمی ہونے والے پانچ افراد کو ٹی ایچ کیو اسپتال گوجرہ اور تین کو الائیڈ اسپتال فیصل آباد منتقل کیا گیا، جہاں تین کی حالت تشویش ناک بتائی جا رہی ہے۔
بدقسمت خواتین سڑک کنارے مہندی کی تقریب میں شرکت کیلئے کھڑی تھیں، حادثے کی اطلاع پر خوشیوں بھرے گھر میں ماتم بچھ گیا۔
پولیس کا کہنا تھا کہ حادثے کے بعد ٹرک ڈرائیور موقع سے فرار ہو گیا ہے، مقدمہ درج کر کے تحقیقات کا آغاز کر دیا ہے۔
وزیر اعلیٰ پنجاب مریم نواز نے واقعہ پر اظہار افسوس کرتے ہوئے ڈرائیور کے خلاف فوری قانونی کارروائی کی ہدایت کردی۔
