نیویارک: سابق امریکی صدر ڈونلڈ ٹرمپ نے 34 مجرمانہ الزامات میں صحت جرم سے انکار کردیا ، ٹرمپ پر 2016 میں اداکارہ کو خاموش رہنے کیلئے ادائیگی چھپانے کا الزام ہے۔
تفصیلات کے مطابق سابق امریکی صدرڈونلڈ ٹرمپ نیویارک کی مین ہیٹن عدالت میں پیش ہوئے ، جہاں انہیں پولیس نے گرفتار کیا ، عدالت میں ٹرمپ پر باقاعدہ فرد جرم عائد کی گئی ، لیکن ٹرمپ نے چونتیس مجرمانہ الزامات میں صحت جرم سے انکار کیا۔
استغاثہ نے الزام لگایا کہ ٹرمپ نے 2016 کے انتخابات کی سالمیت کو نقصان پہنچانے کی کوشش کی، جس میں ایک ہش منی اسکیم کے ذریعے ان خواتین کو ادائیگی کی گئی۔
پراسیکیوٹر کے مطابق ٹرمپ نے کاروباری ریکارڈ میں جعل سازی کی، معلومات منظرعام پر آنے سے ٹرمپ کو انتخابی مہم متاثر ہونے کا خدشہ تھا۔
عدالت سے باہر ٹرمپ پر عزم دکھائی دئیے اور حٓامیوں کو ہاتھ لہرا کر جواب دیا جبکہ نیویارک کی عدالت کے باہر ٹرمپ کے حامی اور مخالفین کی بڑی تعداد موجود تھی۔
کیس کی سماعت مکمل ہونے پر ٹرمپ مین ہٹن کی عدالت سے واپس فلوریڈا پہنچ گئے ، ٹرمپ پر منفی معلومات چھپانے کیلئے اداکارہ کو ایک لاکھ تیس ہزار ڈالر کی ادائیگی کا الزام ہے جبکہ ٹرمپ پر کاروباری ریکارڈ میں جعل سازی اور دیگرالزامات عائد کیے گئے۔
ڈونلڈ ٹرمپ نے ڈسٹرکٹ کورٹ ہاؤس روانگی سے قبل سوشل میڈیا پلیٹ فارم ’ٹروتھ سوشل’ پر لکھا کہ یقین نہیں آ رہا کہ امریکا میں یہ سب ہو رہا ہے۔
سابق امریکی صدر کیخلاف کارروائی پر پاکستانی نژادڈیموکریٹ رہنما ڈاکٹر آصف ریاض قدیر نے کہا کہ ٹرمپ الزامات کا سامنا کرنے کےبجائےمعاملےکوسیاسی رنگ دےرہے ہیں۔
پاکستانی نژاد ری پبلکن رہنما ساجد تارڑ نےعدالتی کارروائی ٹرمپ کو الیکشن سے روکنے کی کوشش قرار دیا جبکہ ڈیموکریٹ رہنما طاہرجاوید کا کہنا تھا کہ ٹرمپ کاریپبلکن صدارتی امیدوار بننا مشکل نظر آرہا ہے۔
