فلوریڈا : سابق صدر ڈونلڈ ٹرمپ نے خود پر عائد تمام الزامات مسترد کرتے ہوئے عدالتی کارروائی کو انتخابی عمل میں مداخلت قرار دے دیا۔
تفصیلات کے مطابق سابق امریکی صدر ڈونلڈ ٹرمپ نے عدالت میں سماعت کے بعد فلوریڈا پہنچے اور اپنی رہائشگاہ پر حامیوں سے خطاب کرتے ہوئے خود پر عائد تمام الزامات مسترد کر دیئے۔
خطاب میں سابق صدر ٹرمپ نے عدالتی کارروائی کو انتخابی عمل میں مداخلت قرار دیتے ہوئے کہا کہ مجھ پر بے بنیاد الزامات لگائے گئے، میں امریکا میں اس قسم کی مداخلت کا کبھی سوچ بھی نہیں سکتے۔
سابق امریکی صدر کا کہنا تھا کہ صدارتی الیکشن میں پچھہتر ملین ووٹ لینے والے صدر پر فردجرم عائد کی گئی، ڈیموکریٹس شروع ہی سے میری انتخابی مہم کو خراب کرنا چاہتے تھے۔
جوبائیڈن پر تنقید کرتے ہوئے انھوں نے کہا کہ بائیڈن انتظامیہ ہر محاذ پر ناکام ہوچکی ہے، روس نے چین، ایران اور شمالی کوریا کے ساتھ امریکا مخالف اتحاد بنا لیا ہے۔
ٹرمپ کا کہنا تھا میرا واحدجرم یہ ہےمیں نےاپنی قوم کو تباہ ہونے سے بچایا ، بائیڈن انتظامیہ کی خارجہ پالیسی ناکامیوں کا شکار ہوئی ، ہم امریکا کو ایک بار پھر عظیم ملک بنائیں گے۔
خیال رہے ریپبلکن ارب پتی ٹرمپ تاریخ میں مجرمانہ الزامات کا سامنا کرنے والے پہلے امریکی صدر بن گئے ہیں ، نیویارک کی عدالت میں ٹرمپ پر کاروباری لین دین کے ریکارڈ میں ’جھوٹ بولنے‘ پر چونتیس الزامات عائد کیے گئے، جن کو انہوں نے ماننے سے انکار کردیا۔
ٹرمپ کی عدالت میں پیشی پرڈیموکریٹس کا ردعمل میں کہنا ہے کہ جیسی کرنی ویسی بھرنی، ٹرمپ پر کاروباری ریکارڈ میں جعل سازی کے چونتیس الزامات عائد کئے گئے۔
