سابق امریکی صدر ڈونلڈ ٹرمپ اداکارہ کو رقم دینے کے کیس میں بڑی مشکل میں پھنس گئے، ٹرمپ کے خلاف دائر کیا گیا مقدمہ 25 مارچ سے شروع ہوگا۔
غیر ملکی ذرائع ابلاغ کا اس حوالے سے کہنا ہے کہ سابق امریکی صدر ڈونلڈ ٹرمپ کرمنل کیس کا سامنا کرنے والے پہلے سابق امریکی صدر ہوں گے۔
نیویارک کے ایک جج کی جانب سے 25 مارچ کو مقدمے کی سماعت کی تاریخ مقرر کرتے ہوئے مقدمے کو خارج کرنے کی سابق امریکی صدر کی درخواست مسترد کردی گئی۔
سال 2016 کے صدارتی انتخابات سے قبل ڈونلڈ ٹرمپ پر اداکارہ کو مبینہ طور پر تعلق چھپانے کے لئے رقم ادا کرنے کے مقدمے میں فرد جرم عائد کی گئی تھی۔
ٹرمپ کی صدارتی الیکشن تک عدالتی ٹرائل روکنے کی آخری کوشش
دوسری جانب سابق امریکی صدر ڈونلڈ ٹرمپ نے رواں سال نومبر میں ہونے والے صدارتی الیکشن تک عدالتی ٹرائل روکنے کی آخری کوشش کی ہے۔
سابق امریکی صدر ڈونلڈ ٹرمپ جنہوں نے رواں سال نومبر میں چار سالہ مدت کے لیے ہونے والے امریکی صدارتی انتخابات کے لیے کمر کس لی ہے اور ری پبلیکنز کی جانب سے صدارتی نامزدگی کی دوڑ میں بھی سب سے آگے ہیں تاہم قانونی مسائل میں گھرے ٹرمپ کو مشکلات کا سامنا ہے۔
