البرٹا : امریکی صدر ڈونلڈ ٹرمپ نے کہا ہے کہ میرا خیال ہے ایران کو جوہری معاہدے پر دستخط کرنا ہوں گے، اگر نہ کیے تو اس کی بیوقوفی ہوگی۔
یہ بات انہوں نے کینیڈا کے شہر البرٹا میں جی سیون اجلاس کے موقع پر برطانوی وزیراعظم کیئر اسٹارمر کے ہمراہ میڈیا سے گفتگو کرتے ہوئے کہی۔
روئٹرز کی رپورٹ کے مطابق ڈونلڈ ٹرمپ نے کہا کہ ایران کے پاس کسی بھی صورت ایٹمی ہتھیار نہیں دیکھنا چاہتے، ہم نے جوہری معاہدے کیلیے ایران کو 60 دن دیئے تھے لیکن انہوں نے انکار کیا۔
امریکی صدر کا کہنا تھا کہ میرا خیال ہے کہ جوہری معاہدے پر ایران کو سائن کرنا ہوگا، ایران نیوکلیئر ڈیل پر دستخط نہیں کررہا تو وہ بیوقوف ہے، اسے جوہری معاہدے پر لازمی دستخط کرنے چاہئیں۔ انہوں نے پیش گوئی کی ہے کہ ایران جوہری معاہدہ کرلے گا۔
امریکی صدرڈونلڈ ٹرمپ نے ایرانی شہریوں کو فوری طور پر تہران خالی کرنے کی تنبیہ کردی، ان کا کہنا تھا کہ انسانی جانوں کا ضیاع شرمناک ہے۔
ایک سوال کے جواب میں انہوں نے کہا کہ ہم یہاں ایران اور اسرائیل کشیدگی کم کرنے کیلئے ہی اکٹھے ہوئے ہیں، آپ سب جانتے ہیں کہ اسرائیل بہت اچھا کر رہا ہے۔
علاوہ ازیں کینیڈا میں برطانوی وزیر اعظم کیئر اسٹارمر کے ساتھ میڈیا سے گفتگو کرتے ہوئے ٹرمپ کا کہنا تھا کہ برطانیہ کے ساتھ ٹریڈ ڈیل کو حتمی شکل دینے کی دستاویز پر دستخط کردیے ہیں۔
صدر ٹرمپ نے سابق امریکی صدر جوبائیڈن انتظامیہ پر شدید تنقید کرتے ہوئے کہا کہ ان کی ناکام پالیسیوں کی وجہ سے ہی دنیا میں جنگیں شروع ہوئیں۔
