ایرانی وزیرخارجہ نے امریکی صدر ڈونلڈ ٹرمپ کی جانب سے سپریم لیڈر آیت اللہ خامنہ ای کو خط لکھنے کے دعویٰ کی تصدیق کر دی۔
ایرانی وزیرخارجہ نے تصدیق کرتے ہوئے کہا ہے کہ ٹرمپ کا خط ایک عرب ملک کے مندوب کے ذریعے جلد ہم تک پہنچےگا۔
ٹرمپ نےجوہری پروگرام پر مذاکرات کےلیے آیت اللہ خامنہ ای کو خط لکھنے کا دعویٰ کیا تھا۔ ایرانی قیادت امریکی دباؤ کے نتیجے میں کسی بھی قسم کے مذاکرات سے انکار کر چکی ہے۔
خط میں ٹرمپ نے کہا تھا کہ ایران سے نمٹنے کے دو ہی طریقےہیں،ایک فوجی طورپر، یا پھر ڈیل کریں۔ ٹرمپ نے خط میں یہ بھی کہا تھا میں میں ڈیل کو ترجیح دوں گا، ایران کو نقصان پہنچانا نہیں چاہتا۔
ایران کے صدر مسعود پزشکیان نے امریکا کے ساتھ مذاکرات نہ کرنے کا اعلان کیا ہے۔ ایرانی صدر نے صدرٹرمپ کی دھمکی آمیز پیشکش پر ردعمل میں کہا امریکا جو کرنا چاہتا ہے کرلے میں بات نہیں کروں گا۔
مسعود پزشکیان نے واضح کیا کہ امریکا ہمیں احکامات اور دھمکیاں دے یہ قابلِ قبول نہیں، اس سے پہلے ایرانی سپریم کمانڈر خامنہ ای نے امریکا کو بدمعاش ملک قرار دیتے ہوئے مذاکرات کی پیشکش مسترد کردی تھی۔
