امریکی صدر ڈونلڈ ٹرمپ نے 13 سالہ بچے ڈی جے کو سیکرٹ سروس کا ایجنٹ مقرر کر دیا اور اس کا اعلان کانگریس کے مشترکہ اجلاس میں کیا۔
غیر ملکی خبر رساں ادارے کے مطابق صدر ڈونلڈ ٹرمپ نے کانگریس کے مشترکہ اجلاس سے اپنے خطاب کا استعمال کرتے ہوئے جہاں ملکی اور بین الاقوامی امور پر گفتگو کی وہیں امریکی خفیہ سروس کے ایک نئے رکن کا انکشاف کیا، جس کی عمر صرف 13 سال ہے۔ تاہم یہ 13 سالہ ڈی جے دماغ کے کینسر سے بچ جانے والا خوش نصیب بچہ ہے۔
رپورٹ کے مطابق ڈی جے جو اجلاس کے دوران اپنے والد کے ساتھ ایوان نمائندگان کی گیلری میں موجود تھا۔ اس کی جانب اشارہ کرتے ہوئے ٹرمپ نے کہا کہ اس بچے نے ہمیشہ پولیس افسر بننے کا خواب دیکھا تھا۔ امریکی صدر کے اس انکشاف اور اعلان پر اجلاس تالیوں سے گونج اٹھا۔
امریکی صدر نے مزید بتایا کہ 2018 میں ڈی جے کو دماغ کے کینسر کی تشخیص ہوئی تھی۔ ڈاکٹروں نے انہیں زندہ رہنے کے لیے زیادہ سے زیادہ پانچ ماہ کا وقت دیا لیکن یہ آج چھ سال بعد بھی زندہ ہے۔ اس دوران ڈی جے نے کئی بار قانون نافذ کرنے والے اعزازی افسر کے طور پر حلف اٹھایا۔
ٹرمپ نے کہا کہ بچے کو مخاطب کرتے ہوئے کہا کہ پولیس کے محکمے کو آپ سے پیار ہے اور آج ہم آپ کو ان کا سب سے بڑا اعزاز دینے جا رہے ہیں۔ میں اپنے نئے سیکرٹ سروس ڈائریکٹر شان کرن سے کہتا ہوں کہ وہ آپ کو امریکا کی خفیہ سروس کا باضابطہ ایجنٹ مقرر کریں۔
امریکی صدر کا یہ اعلان سن کر بچے اور اس کے والد حیران رہ گئے۔
ٹرمپ کے حکم کے بعد سیکریٹ سروس ڈائریکٹر شان کرن نے سیکرٹ سروس کی بظاہر سند پیش کی جس کو بچے نے فخریہ طور پر اوپر اٹھا کر اجلاس کے شرکا کو دکھایا۔
