واشنگٹن : نومنتخب امریکی صدر ڈونلڈ ٹرمپ موجودہ صدر جوبائیڈن سے ملنے وائٹ ہاؤس پہنچ گئے، اس موقع پر دونوں شخصیات نے مصافحہ بھی کیا۔
واشنگٹن کے اوول آفس آمد پر ٹرمپ کا روایتی جوش و خروش سے استقبال کیا گیا، اس موقع پر امریکی صدر جوبائیڈن نے ڈونلڈ ٹرمپ سے گرمجوشی سے ہاتھ ملایا۔
دونوں رہنماؤں نے میڈیا کیمروں کے سامنے ہاتھ ملایا اس موقع پر بائیڈن نے ٹرمپ سے کہا کہ انہیں "پرامن منتقلی” کا انتظار ہے۔ دونوں شخصیات کے درمیان ملاقات میں اقتدار کی منتقلی سمیت دیگر امور پر بھی بات چیت کی گئی۔
ملاقات کے بعد جوبائیڈن اور ڈونلڈ ٹرمپ نے میڈیا کے سامنے بیان اور صحافیوں کے سوالات سے گریز کیا، اپنے ایک بیان میں امریکی صدرجوبائیڈن نے کہا کہ ملاقات سے اقتدارکی منتقلی راہ ہموار ہوگی جبکہ ڈونلڈ ٹرمپ کا کہنا ہے کہ سیاست مشکل ضرور ہے لیکن اقتدار کی منتقلی کا منتظر ہوں۔ ،
امریکی نائب صدر کاملا ہیرس نے ملاقات میں شرکت نہیں کی، ملاقات کیلئے میلانیا ٹرمپ کو بھی مدعو کیا گیا تھا مگر وہ وائٹ ہاؤس نہیں آئیں۔
غیر ملکی خبر رساں ادارے کی رپورٹ کے مطابق صدر جوبائیڈن کی دعوت پر ٹرمپ وائٹ ہاؤس پہنچے تھے، نو منتخب امریکی صدر ڈونلڈ ٹرمپ 20جنوری کو 47ویں صدر کی حیثیت سے اپنے عہدے کا حلف اٹھائیں گے۔
جوبائیڈن سے ملاقات کے بعد ڈونلڈ ٹرمپ کیپیٹل ہل پہنچ گئے، جہاں انہوں نے ری پبلکن اراکین کانگریس سے ملاقات کی۔
ہاؤس اسپیکرمائیک جانسن کا کہنا ہے کہ آج امریکا میں ایک نیا دن ہے، ریپبلکن پہلے دن سے ٹرمپ انتظامیہ کے ایجنڈے پر کام شروع کرنے کیلئے تیار ہیں۔
واضح رہے کہ امریکی صدارتی انتخابات سے قبل دوںوں رہنماؤں کے درمیان انتخابی مہم میں سخت کشیدگی دیکھنے میں آئی تھی۔
اس موقع پر بائیڈن نے ٹرمپ کے مقابلے میں ناقص کارکردگی کے باعث انتخابی دوڑ سے دستبرداری اختیار کرلی تھی۔ تاہم ان کی نائب صدر اور ڈیموکریٹک پارٹی کی صدارتی امیدوار کمالا ہیرس 5 نومبر کو ٹرمپ کے مقابلے میں واضح فرق سے شکست کھا گئیں۔
