واشنگٹن: شمالی کوریا کے تنازعے پر امریکی صدر ڈونلڈ ٹرمپ نے جنوبی کوریائی سربراہ مون جے ان سے ٹیلی فونک رابطہ کیا۔
تفصیلات کے مطابق امریکی اور جنوبی کوریائی صدور کے درمیان 35 منٹ تک ٹیلی فونک گفتگو ہوئی اس دوران دونوں رہنماؤں نے شمالی کوریا معاملے پر تفصیلی گفتگو کی۔
غیر ملکی خبر رساں ادارے کا کہنا ہے کہ ٹرمپ اور مون جے ان نے اس بات پر زور دیا ہے کہ شمالی کوریا کو مکمل طور پر غیرجوہری ملک بنایا جائے گا۔
وائٹ ہاؤس کی جانب سے جاری کردہ بیان میں کہا گیا ہے کہ امریکا اور جنوبی کوریا نے اتفاق کیا ہے کہ حتمی فیصلہ شمالی کوریا کو غیر ایٹمی بنانا ہے۔
شمالی کوریا کی جانب سے حال ہی میں میزائل کا کامیاب تجربہ کیا گیا ہے جس کے بعد امریکی صدر نے معاملے کو سلجھانے کے لیے رابطے تیز کردیے ہیں۔
شمالی کوریا کے میزائل مشاہدے کے بعد امریکی صدر ڈونلڈ ٹرمپ نے اپنے ایک بیان میں کہا تھا کہ پوری امید ہے کم جونگ ان تعلقات کی راہ میں خطرات نہیں ڈالیں گے۔
انہوں نے یہ بھی کہا تھا کہ کم جونگ ان سے اچھے تعلقات ہیں، تنازعہ جلد حل ہوجائے گا۔ خیال رہے کہ شمالی کوریا کم جونگ ان کی ہدایت پر ملک کے دفاعی نظام کو مزید مضبوط کررہا ہے۔
شمالی کوریائی سربراہ تعلقات کی راہ کو خطرے میں نہیں ڈالیں گے: ٹرمپ
دوسری جانب جنوبی کوریائی حکام کا کہنا ہے کہ شمالی کوریا غذائی بحران کا شکار ہے جس کے پیش نظر امریکا کی جانب سے غذائی امداد کا فیصلہ کیا گیا ہے۔
