واشنگٹن : امریکی صدر ٹرمپ نے افغانستان میں کابل ائیرپورٹ دھماکے میں ملوث دہشت گرد کی گرفتاری میں مدد پر پاکستان کا شکریہ ادا کیا۔
تفصیلات کے مطابق امریکی صدرٹرمپ نے کانگریس سے خطاب میں پاکستان سے اظہار تشکر کرتے ہوئے کہا کہ افغانستان میں 13 امریکیوں کو ہلاک کرنیوالے داعش کے دہشت گرد کو ہم نے پکڑلیا ہے ،اہم ترین دہشت گرد کو پکڑنے میں مدد دینے پر پاکستان کے شکرگزار ہیں۔
امریکی صدر کا کہنا تھا کہ امریکی فوجیوں کے قتل میں ملوث دہشت گرد کو امریکا لایا جارہا ہے، امریکیوں کویقین دلاتاہوں،دہشتگرد کو امریکی نظام انصاف کی تلوار کا سامنا کرے گا۔
انھوں نے مزید کہا کہ دہشت گرد کی گرفتاری میں پاکستانی حکومت کا شکریہ اداکرتا ہوں ،ساڑھے 3 سال پہلے کابل دھماکے میں 13 امریکی فوجی جان سے گئے تھے۔
ڈونلڈ ٹرمپ کا کہنا تھا کہ پاناما کینال کوواپس لیاجائے گا، پاناما کینال بنانےمیں امریکی قربانیاں ہیں،پاناما کینال بنانے میں اس لئے قربانیاں نہیں دیں کہ اسے چین کے حوالےکیاجائے۔
انھوں نے کہا گرین لینڈ کے باشندوں کو کہتا ہوں آپ کی سیکیورٹی ہماری ذمہ داری ہے، گرین لینڈ کے شہری امریکا میں شامل ہو جائیں، ہم آپ کو ترقی یافتہ اور امیر بنائیں گے۔
امریکی صدر کا مزید کہنا تھا کہ امریکا اور بین الاقوامی سیکیورٹی کیلئے ضروری گرین لینڈ امریکا کا حصہ بنے، گرین لینڈ کو امریکا کا حصہ بناکر ہی رہیں گے۔
