واشنگٹن: امریکی صدر ڈونلڈ ٹرمپ اور کانگریس کے درمیان تنازع شدت اختیار کرگیا، صدر ٹرمپ نے میکسیکو بارڈر بند کرنے کی دھمکی دے دی۔
تفصیلات کے مطابق امریکی صدر ڈونلڈ ٹرمپ نے دھمکی دی ہے کہ اگر میکسیکو سرحد پر دیوار تعمیر کرنے کے لیے فنڈ جاری نہ کیے گئے تو سرحد بند کردی جائے گی۔
غیر ملکی خبر رساں ادارے کے مطابق میکسیکو سرحد پر دیوار کی تعمیر کے لیے فنڈ کی مد میں 23 بلین ڈالر درکار ہے، صدر ٹرمپ نے فنڈ نہ ملنے کی صورت میں بارڈر بند کرنے کی دھمکی دیتے ہوئے ذمہ دار کانگریس کو قرار دیا ہے۔
ٹرمپ انتظامیہ اور کانگریس کے درمیان تنازعے کے باعث کئی سرکاری سرگرمیاں بھی معطل ہیں جبکہ گذشتہ دنوں سرکاری دفاتر بھی بند کردیے گئے تھے۔
امریکی کانگریس نے فنڈ کی مد میں 5 بلین ڈالر دینے کا اعلان کیا ہے، تاہم ٹرمپ انتظامیہ 23 بلین ڈالر حاصل کرنے کے لیے بضد ہے۔
دوسری جانب میکسیکو کے صدر انڈرس مینوئل کا کہنا ہے کہ سرحد پر دیوار تعمیر کرنے سے متعلق ٹرمپ کا بیان ان کا ذاتی معاملہ ہے، ہم نے ہمیشہ دونوں ملکوں کے درمیان مضبوط روابط کی بات کی ہے۔
امریکی صدر اور کانگریس میں اختلافات، سرکاری دفاتر بند
ان کا کہنا تھا کہ خطے کی سلامتی ہمارے لیے اولین ترجیح ہے، مہاجرین کو سہولیات فراہم کرنے کے لیے انسانی بنیادوں پر ہرممکن اقدامات کرتے رہیں گے۔
امریکی میڈیا کے مطابق اپوزیشن پارٹی بارڈر سیکیوٹی کے لیے ٹرمپ انتظامیہ کے ساتھ ہے، اور سیکیوٹی کی مد میں 1.3 بلین ڈالر آفر بھی کرچکی ہے، تاہم سرحد پر دیوار تعمیر کرنے کے خلاف ہے۔
