امریکی صدارتی انتخابات میں ڈونلڈ ٹرمپ کی جیت نے صرف ایک دن میں ایلون مسک کی دولت میں اربوں ڈالر کا اضافہ کرا دیا۔
ڈونلڈ ٹرمپ کے دوسری بار امریکا کے صدر منتخب ہونے پر سب سے پہلے جس شخصیت کو فائدہ پہنچا ہے وہ ان کے قریبی حمایتی ایلون مسک ہیں جن کی دولت میں ایک ہی دن میں 26.5 ارب ڈالر کا اضافہ ہوا ہے۔
ڈونلڈ ٹرمپ کی انتخابی مہم کے دوران دنیا کی امیر ترین شخصیات میں شامل بزنس ٹائیکون ایلون مسک نے بھی ٹرمپ کی حمایت میں مہم چلائی اور انتخابی مہم کے لیے نہ صرف خود براہ راست کثیر فنڈ فراہم کیا بلکہ ٹرمپ کو سپورٹ کرنے والوں کو بھی 10 لاکھ ڈالر یومیہ دے کر مالا مال کیا۔
ایلون مسک کی یہ محنت رائیگاں نہیں گئی بلکہ ٹرمپ کے باضابطہ طور پر صدر امریکا کا منصب سنبھالنے سے قبل ہی انہیں اس کا صلہ اپنی دولت میں 26.5 ارب ڈالر اضافے کی صورت میں ملا ہے۔
ٹرمپ کی جیت کے ساتھ ہی بدھ کے روز کی ان کی کمپنی ٹیسلا کے شیئر میں 14.75 فیصد اضافہ ریکارڈ کیا گیا جس سے ان کی دولت میں خطیر اضافہ ہوا جو ایک ہی دن میں 26.5 ارب ڈالر اضافے کے بعد 290 ارب ڈالر پہنچ گئی ہے۔
اگر ٹیسلا کے شیئرز کی قیمت میں اضافہ ایسے ہی جاری رہا تو وہ 300 ارب ڈالر کے کلب میں بھی شامل ہو جائیں گے۔
امریکی صدارتی انتخاب 2024
صرف ایلون مسک ہی نہیں بلکہ ٹرمپ کی کامیابی سے دیگر امریکی ارب پتی شخصیات کی دولت میں بھی نمایاں اضافہ ہوا ہے۔ ان میں جیف بیجوس، لیری ایلیسن، وارین بفیٹ، لیری پیج، سرگی برین، جین سین ہُوانگ، مائیکل ڈیل، اسٹیو بالمبر، بل گیٹس وغیرہ شامل ہیں۔
بلومبرگ بلینیئر انڈیکس کے مطابق ایلن مسک کی دولت ایک ہی دن میں 26.5 ارب ڈالر بڑھ گئی جبکہ لیری ایلیسن کی دولت میں 9.88 ارب ڈالر کا اضافہ ہوا ہے۔ وہیں وارین بفیٹ کی دولت 7.88 ارب ڈالر جبکہ لیری پیج کی 5.53 ارب ڈالر بڑھی ہے۔
سرگی برین نے 5٫17 ارب ڈالر تو جین سین ہُوانگ نے 4.86 ارب ڈالر کی کمائی کی ہے۔ اس کے علاوہ مائیکل ڈیل، اسٹیو بالمبر، بل گیٹس کی دولت میں بھی 1.82 ارب ڈالر سے لے کر 3.31 ارب ڈالر تک کا اضافہ ہوا ہے۔
