اسلام آباد : ترک صدر رجب طیب اردوان آج پارلیمنٹ کے مشترکہ اجلاس سے خطاب اور وزیراعظم عمران خان سے ون آن ون ملاقات کریں گے جبکہ آج شام دونوں رہنماؤں کی مشترکہ پریس کانفرنس بھی ہوگی۔
تفصیلات کے مطابق ترک صدر رجب طیب اردوان آج پارلیمنٹ کے مشترکہ اجلاس سے خطاب کریں گے اور فیصل مسجدمیں نمازجمعہ کی ادائیگی کےبعدپاک ترک بزنس فورم میں شریک ہوں گے۔
ترک صدر آج وزیراعظم عمران خان سے ون آن ون ملاقات کریں گے ، عمران خان اوررجب طیب اردوان کی ملاقات کادورانیہ ایک گھنٹہ15منٹ ہوگا ، دونوں رہنماؤں کی ملاقات کے بعد وفود کی سطح پر بھی ملاقات ہوگی ، ملاقاتوں کے بعد مفاہمتی یادداشتوں پردستخط کی تقریب ہوگی، جس میں دفاع، ریلویز، اطلاعات، تجارت ، پوسٹل سروس سمیت دوطرفہ تعاون کے کئی معاہدوں پر دستخط ہوں گے۔
وزیراعظم اور ترک صدرآج شام مشترکہ پریس کانفرنس بھی کریں گے جبکہ وزیراعظم ہاؤس میں ترک صدر کے اعزازمیں عشائیہ دیاجائےگا، بعد ازاں رجب طیب اردوان آج رات وطن واپس روانہ ہوں گے۔
خیال رجب طیب اردوان نے بطور صدر 17نومبر 2017 کوپہلی مرتبہ خطاب کیا تھا جبکہ وہ بطور ترک صدر پاکستان کی پارلیمنٹ کے مشترکہ اجلاس سے دوسرا خطاب کریں گے، ترک صدر رجب طیب اردوان کا پاکستان کی پارلیمنٹ سے چوتھی بار خطاب کو انتہائی اہمیت کا حامل سمجھا جا رہا ہے،ان کا پارلیمنٹ سے خطاب پاکستان کے ساتھ والہانہ محبت اورلازوال دوستی کی غماز ی کرتا ہے۔
مزید پڑھیں : ترک صدر کی پاکستان آمد پر شاندار استقبال ، اعزاز میں گارڈ آف آنر پیش
گذشتہ روز ترک صدر کا پاکستان پہنچنے پر شایان شان استقبال کیا گیا ، نورخان ایئربیس پرمعزز مہمان کی راہ میں ریڈ کارپٹ بچھایا گیا ، وزیراعظم عمران خان نے نورخان ایئربیس پر مہمان صدر کو خوش آمدید کہا اور خود گاڑی ڈرائیو کرکے مہمان صدرکو وزیراعظم ہاؤس لائے، جہان ترک صدر کو گارڈ آف آنرپیش کیا گیا۔
بعد ازاں ترک صدر رجب طیب اردوان صدر مملکت سے ملاقات کے لیے ایوان صدر پہنچے ، جہاں صدر عارف علوی نے ترک ہم منصب اور خاتون اول کا استقبال کیا، ترک صدر اور اہلیہ نے بچوں کو پیار کیا ان کے ساتھ تصویربنوائی۔
پاک ترک صدور میں ون آن ون ملاقات بھی ہوئی ، جس کے بعد مہمان کے اعزاز میں پُر تکلف عشائیے کا اہتمام کیاگیا، عشائیے میں آرمی چیف جنرل قمر جاوید باجوہ ،اسپیکر قومی اسمبلی چیئرمین سینیٹ سمیت دیگر حکام شریک ہوئے۔
