ترکیہ میں استنبول کے گرفتار میئر اکرم امام اوغلو سے متعلق سوشل میڈیا پوسٹ کرنے پر 37 افراد کو حراست میں لے لیا گیا۔
غیر ملکی میڈیا رپورٹس کے مطابق میئر اکرم امام اوغلو کے حامیوں نے ترکیہ کی سڑکوں، یونیو رسیٹیز کیمپس اور ٹرین اسٹیشنز پر بھی حکومت مخالف مظاہرے کیے، مظاہرین نے اکرم امام اوغلو کی فوری رہائی کا مطالبہ کیا ہے۔
رپورٹ کے مطابق ترک وزیرِ داخلہ کا کہنا ہے کہ میئر اکرم امام اوغلو کی گرفتاری سے متعلق اشتعال انگریز اور نفرت پھیلانے پر مبنی سوشل میڈیا پوسٹس کرنے پر 37 مشتبہ افراد کو حراست میں لیا گیا ہے۔
طیب اردوان کے سیاسی حریف بدعنوانی کے الزام میں گرفتار
دوسری جانب استنبول کے گرفتار میئر امام اوغلو نے عدلیہ سے مطالبہ کیا ہے کہ وہ ان کی حراست کا حکم دینے پر ترک حکومت کی جانب سے عدالتوں کے غلط استعمال کے خلاف موقف اختیار کرے۔
انہوں نے اپنے وکلاء کے ذریعے بھیجے گئے ایک پیغام میں ایکس پرلکھا کہ میں ہزاروں معزز، اخلاقی پراسیکیوٹرز اور ججوں سے بھی مطالبہ کرتا ہوں کہ آپ کو کھڑے ہو کر عدلیہ میں موجود ان افراد کے خلاف کارروائی کرنی چاہیے جو عدلیہ کو برباد کر رہے ہیں، پوری دنیا کے سامنے ہمیں رسوا کر رہے ہیں، اور ہماری ساکھ کو تباہ کر رہے ہیں ۔
واضح رہے کہ سیکولر ریپبلکن پیپلز پارٹی سے تعلق رکھنے والے اکرم امام اوغلو کو ترک صدر طیب اردوان کے سب سے مضبوط سیاسی حریفوں میں شمار کیا جاتا ہے، انہیں گزشتہ روز بدعنوانی اور دہشت گرد گروہ کی مدد کرنے کا الزامات کے تحت گرفتار کیا گیا ہے۔
