واشنگٹن: امریکی ٹی وی چینل کے رپورٹر کی براہ راست نشریات کے دوران تھوک لگا کر بال سیٹ کرنے کی ویڈیو وائرل ہوگئی۔
غیرملکی خبررساں ادارے کے مطابق امریکی ٹی وی چینل کے رپورٹر میٹ بریڈلی کی براہ راست نشریات کے دوران تھوک لگا کر بال بنانے کی ویڈیو سوشل میڈیا پر وائرل ہوگئی ویڈیو میں دیکھا جاسکتا ہے کہ وہ تھوک لگا کر بال بنانے میں مصروف ہیں۔
امریکی نیوز چینل ایم ایس این بی سی کے ساتھی اینکر علی ویلسائی نے نیوز سیگمنٹ میں داعش کے جنگجو سے متعلق شام کے حالات پر رپورٹر کی رائے لینا چاہی تو وہ تھوک لگا کر بال بنانے میں مصروف تھے۔
رپورٹر میٹ بریڈلی نے تھوک ایک ہاتھ پر ڈالا اور پھر اسے دونوں ہاتھ میں لگا کر اپنے بال سنوارے۔
ٹویٹر پر مذکورہ ویڈیو کو ری ٹویٹ کرنے کا سلسلہ جاری ہے اور لوگ کہتے ہوئے نظر آرہے ہیں کہ ’لائیو نشریات کے دوران ایسا بھی ہوسکتا ہے۔‘
رپورٹ کے مطابق 2001 میں ریلیز ہونے والی فلم ’دی ویڈنگ پلانر‘ میں ہالی ووڈ اداکارہ جنیفر لوپز نے اسی طرح ہاتھوں میں تھوک لگا کر اپنے بال بنائے تھے۔
مزید پڑھیں: امریکی ٹی وی چینل کے اینکر کا 10 برس سے ہاتھ نہ دھونے کا اعتراف
ٹی وی رپورٹر نے یہ عمل ہالی ووڈ اداکارہ جنیفر لوپز سے متاثر ہوکر کیا ہے یا نہیں یہ واضح نہیں ہوسکا ہے۔
واضح رہے کہ گزشتہ ماہ امریکی ٹی وی چینل فوکس نیوز کے اینکر نے اعتراف کیا تھا کہ انہوں نے دس برس سے اپنے ہاتھ نہیں دھوئے ہیں، اینکر پرسن پیٹ ہیگسیتھ کا کہنا تھا کہ کوئی جراثیم نہیں ہوتے، جراثیم حقیقی چیز نہیں ہے اور مجھے ہاتھ دھوئے ہوئے دس برس کا عرصہ بیت چکا ہے۔
