بالی ووڈ اداکارہ و مصنفہ ٹوئنکل کھنہ نے کہا ہے کہ بھارتی خواتین کے لیے تاریک گلی میں کسی مرد کا سامنا کرنے کے بجائے بھوتوں کا سامنا کرنا زیادہ محفوظ ہے۔
بالی ووڈ اداکارہ سے مصنفہ بننے والی ٹوئنکل نے بھارتی میڈیا میں شائع ہونے والے اپنے حالیہ کالم میں ’بھارتی خواتین بھوت سے کیوں نہیں ڈرتیں؟ ‘ کے موضوع پر لکھا ہے۔
اداکارہ نے اپنے کالم میں اینے بچپن کے دنوں کی ایک کہانی سنائی، جس میں انہوں نے بڑی خالہ پر آسیب کا ذکر کیا، ٹوئنکل کھنہ کا کہنا تھا کہ ڈراؤنی فلموں میں دکھائی جانے والی خوفناک چیزوں سے زیادہ خطرناک واقعات ہم اپنے ارد گرد روزانہ دیکھتے ہیں۔
اداکارہ نے کالم میں کولکتہ میں ایک زیر تربیت ڈاکٹر کی عصمت دری اور قتل کا واقعہ اور بدلہ پور کے ایک اسکول میں دو بچیوں کے ساتھ جنسی زیادتی کا ذکر کیا۔
ٹوئنکل کھنہ کا کہنا تھا کہ کس طرح فلم ’استری ‘ خواتین کو روزانہ درپیش خوف کے خلاف ایک بغاوت کی نمائندگی کرتی ہے، جو وہ سماج میں محسوس کرتی ہیں۔
اداکارہ و مصنفہ ٹوئنکل کھنہ نے زور دیا کہ ہمیں ایسے مسائل پر بات کرنے کی ضرورت ہے تاکہ خواتین کے حقوق اور ان کی حفاظت کو یقینی بنایا جا سکے۔
