اسلام آباد: وزیر اعظم شہباز شریف کے مزید 2 معاونین خصوصی تعینات کردیے گئے جس کے بعد وفاقی کابینہ کے ارکان کی تعداد 72 اور معاونین خصوصی کی تعداد 27 ہوگئی، 22 معاونین کے پاس کوئی قلمدان نہیں۔
تفصیلات کے مطابق وزیر اعظم شہباز شریف کے مزید 2 معاونین خصوصی کی تعیناتی کا نوٹیفکیشن جاری کردیا گیا، سردار شاہ جہاں یوسف اور نعمان لنگڑیال کو معاونین خصوصی تعینات کیا گیا ہے۔
نئے معاونین کی تعیناتی کے بعد وزیر اعظم شہباز شریف کی کابینہ میں ارکان کی تعداد 72 ہوگئی جبکہ وزیر اعظم کے معاونین خصوصی کی تعداد بڑھ کر 27 ہوگئی۔
وفاقی کابینہ میں وفاقی وزرا کی تعداد 34، وزرائے مملکت کی تعداد 7 اور مشیروں کی تعداد 4 ہے۔
نوٹیفکیشن کے مطابق دونوں نئے معاونین خصوصی کو کوئی قلمدان نہیں دیا گیا جبکہ وفاقی وزیر یا وزیر مملکت کے برابر عہدہ بھی نہیں دیا گیا۔
فی الوقت وزیر اعظم کے 27 میں سے 22 معاونین خصوصی کے پاس کوئی قلمدان نہیں، وفاقی وزرا میں سے ایک جاوید لطیف بھی کئی مہینوں سے بغیر کسی قلمدان کے وفاقی وزیر کے عہدے پر موجود ہیں۔
