بھارت کے شہر لکھنؤ میں سڑک کنارے چہل قدمی کرنے والی دو روزے دار خواتین کو کار سوار ملزم نے کچل کر جان سے مار دیا۔
میڈیا رپورٹس کے مطابق پولیس نے بتایا کہ کار ایک تاجر کا نو عمر بیٹا چلا رہا تھا۔ مقتولین کی شناخت 65 سالہ شاہدہ بانو اور 42 سالہ شبنم کے نام سے ہوئی ہے۔
پولیس کے مطابق کار ڈرائیور کو حراست میں لے کر اس کے خلاف مقدمہ درج کر لیا گیا جبکہ جائے وقوعہ کے اطراف لگے سی سی ٹی وی فوٹیجز کا جائزہ لیا جا رہا ہے۔
ملزم نے مقتولین کو اُس وقت کار سے کچل کر قتل کیا جب وہ سحری کرنے کے بعد چہل قدمی کر رہی تھیں۔ ملزم نے انہیں کار سے ٹکر ماری اور کچھ میٹر تک گھسیٹا۔
خواتین کی چیخیں سن کر کچھ راہگیر مدد کیلیے بھاگے اور کار سوار کو پکڑ لیا جو فرار ہونے کی کوشش کر رہا تھا۔ انہوں نے ملزم کو پٹائی کرنے کے بعد پولیس کے حوالے کیا۔
انسپکٹر اکھلیش مشرا کے مطابق کار ایک تاجر کی ہے جو نیرال نگر میں رہتا ہے، ملزم تاجر کا بیٹا ہے۔
