امریکا کے جنوب مغربی علاقے شدید گرمی کی لپیٹ میں آ گئے ہیں، پارہ 48.8 سینٹی گریڈ تک جانے کا امکان ہے۔

امریکی میڈیا کے مطابق رواں سال پورے کیلیفورنیا اور جنوب مغرب کو شدید گرمی نے اپنی لپیٹ میں لیا ہے، نیشنل ویدر سروس نے خبردار کیا ہے کہ خطے کے زیادہ تر حصے میں ریکارڈ درجہ حرارت کے ساتھ ’’خطرناک‘‘ گرمی کی توقع ہے۔

نیشنل ویدر سروس نے شہریوں کو خبردار کرتے ہوئے آئندہ چند روز میں درجہ حرارت 48.8 ڈگری ہونے کی پیش گوئی کی ہے۔ اس ہفتے امریکا کے مغربی حصے پر ’ہیٹ ڈوم‘ اترنے کے باعث 34 ملین سے زیادہ امریکی انتہائی درجہ حرارت کا سامنا کریں گے۔

ریاست نیواڈا کے شہر لاس ویگاس اور ایریزونا کے شہر فینکس میں درجہ حرارت 43.3 ڈگری سے زائد ہو سکتا ہے، کیلیفورنیا سے وسطی ایریزونا تک کے علاقے شدید گرمی کی لپیٹ میں ہوں گے، کیلیفورنیا کے ڈیتھ ویلی کا درجہ حرارت بھی 48 ڈگری تک جائے گا۔