واشنگٹن : میانمار میں مسلمانوں پر ظلم و ستم پر امریکا نے تحقیقات کا مطالبہ کردیا، اقوام متحدہ میں امریکی مندوب نکی ہیلی کا کہنا تھا کہ عالمی برادری میانمار میں ہونے والے مظالم کو نظرانداز نہیں کرسکتی۔
امریکا نے میانمار میں روہنگیا مسلمانوں پر مظالم کی تحقیقات کا مطالبہ کرتے ہوئے کہا ہے کہ روہنگیا مسلمانوں کے قتل اور ظلم وستم کی تحقیقات ہونی چاہیے۔
امریکی مندوب نکی ہیلی کا کہنا تھا کہ عالمی برادری میانمار میں ہونے والے مظالم کو نظرانداز نہیں کرسکتی، روہنگیا مسلمانوں پر ہونے والے مظالم کی تحقیقات ہونی چاہیے۔
نکی ہیلی نے میانمار کی حکومت سے اقوام متحدہ کے فیکٹ فائنڈنگ مشن کو ویزہ جاری کرنے کا مطالبہ کیا تاہم میانمارحکومت نے یو این ایچ آرسی کی تحقیقاتی کمیٹی کو اجازت دینے سے انکار کر دیا ہے۔
خیال رہے کہ اقوام متحدہ کی انسانی حقوق کی کونسل میں مارچ میں اس بات پر اتفاق رائے ہوا تھا کہ روہنگیا مسلمانوں کے قتل، آبرو ریزی اور تشدد کے الزامات کی تحقیقات کے لیے ایک مشن روانہ کیا جائے گا۔
قبل ازیں اقوام متحدہ کے انسانی حقوق کے حوالے سے تحقیقات کرنے والے ماہرین کا کہا تھا کہ اس بات کے بہت زیادہ امکانات ہیں کہ میانمار کی فورسز انسانیت کے خلاف جرائم میں ملوث ہیں۔
