دبئی: متحدہ عرب امارات میں صحت حکام نے ماربرگ بخار کے سلسلے میں عوام کے لیے الرٹ جاری کر دیا۔
گلف نیوز کے مطابق اماراتی وزارت صحت نے عوام کو ماربرگ ہیمرجک بخار کا سبب بننے والے وائرس سے خبردار کرتے ہوئے کہا ہے کہ وہ تنزانیہ اور استوائی گنی کا سفر کرنے سے گریز کریں۔
وزارت صحت کے مطابق ماربرگ وائرس کے پھیلاؤ کے سبب جب تک ضروری نہ ہو، مذکورہ بالا ممالک کا سفر نہ کیا جائے۔ متعدد عرب ممالک نے اپنے شہریوں کو وائرس کے پھیلاؤ کی وجہ سے تنزانیہ اور استوائی گنی کا سفر ملتوی کرنے کا مشورہ دیا ہے۔
خلیج ٹائمز نے متحدہ عرب امارات میں وبائی امراض کی نگرانی کے مؤثر نظام کے حوالے سے رپورٹ کیا ہے کہ مقامی حکام بعض ممالک میں ماربرگ وائرس کے پھیلنے کا پتا لگانے کے لیے اقدامات اٹھا رہے ہیں۔
اماراتی وزارت صحت نے عوام سے اپیل کی ہے کہ ماربرگ وائرس کے پھیلاؤ کے حوالے سے صرف مصدقہ اطلاعات پر انحصار کریں، اور افواہیں پھیلانے سے گریز کیا جائے۔
صحت حکام کا کہنا تھا کہ عالمی سطح پر اس بیماری کی شدت کے حوالے سے صورت حال پر گہری نظر رکھی جا رہی ہے۔ حکام نے کہا کہ اگر مذکورہ ممالک کا سفر ناگزیر ہو تو بیماری سے بچنے کے لیے ضروری احتیاطی تدابیر اختیار کی جائیں جن میں مریضوں کے ساتھ قریبی ربط سے گریز، آلودہ سطحوں کو چھونا اور غاروں میں جانے سے گریز شامل ہے۔
واضح رہے کہ ماربرگ وائرس سے پیدا ہونے والی بیماری ایک شدید اور جان لیوا ہیمرج بخار ہے، جس میں خون جاری ہوتا ہے، اور جو انسانی صحت کے لیے نایاب لیکن انتہائی خطرناک ہے۔ حکام کے مطابق یہ ایک زونوٹک آر این اے وائرس ہے جو جانوروں سے انسانوں میں بند ماحول میں منتقل ہوتا ہے۔
ماربرگ وائرس کی علامات اچانک پیدا ہوتی ہیں اور ان میں بخار، سردی لگنا، سر درد، سینے میں درد اور گلے کی سوزش شامل ہیں، جیسے جیسے بیماری بڑھتی ہے، علامات تیزی سے شدید ہوتی جاتی ہیں اور ان میں یرقان، وزن میں شدید کمی اور صحت کی دیگر سنگین پیچیدگیاں شامل ہو سکتی ہیں۔
