عام طور پر ہر جوڑے کی یہ خواہش ہوتی ہے کہ اپنی شادی کے دن کچھ منفرد کرکے اسے یادگار بنادیا جائے، یو اے ای کے ایک جوڑے نے اپنی شادی کو یادگار بنانے کے لئے جہاز میں دوران پرواز شادی کرنے کا فیصلہ کیا، جس کی ویڈیو بھی سوشل میڈیا پر گردش کررہی ہے۔
غیر ملکی ذرائع ابلاغ کے مطابق متحدہ عرب امارات سے تعلق رکھنے والے جوڑے کی شادی کی تقریب ہوائی جہاز میں ہوئی، دلہن کے والد جو کہ یو اے ای کے ایک بڑے بزنس مین ہیں کی جانب سے اپنی بیٹی کی شادی کے لئے جہاز کرائے پر لیا گیا۔
لڑکی کے والد دلیپ پوپل نے بوئنگ 747 کرائے پر حاصل کیا اور جہاز نے دبئی سے عمان کے لئے اڑان بھری۔ اس دوران ان کی بیٹی ودھی پوپل کی شادی ہردیش سینی سے منعقد کی گئی۔
شادی کی تقریب میں میڈیا کے ارکان، قریبی دوستوں اور خاندان کے افراد سمیت تقریباً 350 مہمان شریک ہوئے۔
شادی کی تقریب میں شرکت کرنے والے جیسے ہی دبئی وی آئی پی ٹرمینل پر پہنچے، وہاں پر بھی جشن منایا گیا، طیارے میں سوار ہونے سے پہلے مسافروں نے اپنے بورڈنگ پاسز کے ساتھ تصاویر بھی لیں۔
شادی کی تقریب کی مناسبت سے ہوائی جہاز کو سجایا بھی گیا تھا جبکہ ہرحصے میں ایک چھوٹا پروٹیکٹر نصب کیا گیا تھا تاکہ مہمان رسومات کو دیکھ سکیں۔
مہمانوں کو تقریب کے دوران روایتی ہندوستانی کھانے پیش کیے گئے جن میں مشروم پلاؤ، پالک پنیر ، دال اور دیگر اشیاء شامل تھیں۔
