ابوظہبی : یو اے ای درہم کے مقابلے میں پاکستانی روپے کی قدر میں کمی آئی ہے، پاکستانی روپے کی قیمت 40 پیسے گرگئی۔

تفصیلات کے مطابق پاکستانی روپے کے مقابلے میں یو اے ای درہم کی قیمت میں 40 پیسے اضافہ سامنے آیا ہے، عرب میڈیا کے مطابق پاکستانی روپے کے مقابلے میں یو اے ای درہم کی قیمت میں کئی روز بعد اضافہ ہوا ہے۔

تازہ ترین اطلاعات کے مطابق اماراتی درہم 40 پیسے بڑھ کر 75.54 روپے کا ہوگیا۔ گزشتہ ہفتے کے اختتام پر پاکستانی روپے کی قدر میں اماراتی درہم کے مقابلے میں 1.44 روپے بہتری آئی تھی۔

عرب میڈیا رپورٹس کے مطابق ایک ہزار پاکستانی روپے میں اب 13.23 درہم ملیں گے۔ دوسری جانب بھارتی کرنسی میں یو اے ای درہم 22.58 روپے اور بنگلہ دیشی کرنسی میں درہم 29.89 ٹکے پر مستحکم ہے۔

واضح رہے کہ انٹربینک میں پاکستانی روپے کے مقابلے میں امریکی ڈالر کی قدر میں 3.26 روپے اضافہ ہوگیا، جس کے بعد ڈالر کی قیمت 280.29 روپے پر پہنچ گئی۔