متحدہ عرب امارات (یو اے ای) کے رہائشیوں کو اپنے ہیلتھ انشورنس پریمیم کے لیے مزید رقم خرچ کرنا ہوگی، کیونکہ ایک درجن کمپنیوں کی جانب سے گزشتہ دو ماہ میں پریمیم میں 35 فیصد تک اضافہ کردیا گیا ہے۔
بین الاقوامی خبر رساں ادارے کی رپورٹ کے مطابق ریٹس اگست 2023ء کے اوائل میں بڑھنا شروع ہوئے اور یہ سلسلہ ستمبر اور اکتوبر تک جاری رہا۔
ہیلتھ انشورنس کے حوالے سے درخواست دہندگان کی عمر کے لحاظ سے اوسط قیمتوں میں 10 فیصد سے 35 فیصد کے درمیان اضافہ ہوا ہے۔ ایک بیمہ کنندہ کے لیے تازہ ترین شرح نظرثانی اکتوبر کے وسط میں ہوئی۔
طبی ضروریات کی مد میں قابل قدر اضافہ سامنے آنے کی وجہ سے ہر سال وبائی امراض کے بعد ہیلتھ انشورنس کی شرحوں میں 15 فیصد سے 20 فیصد تک مسلسل اضافہ سامنے آرہا ہے۔
یو اے ای میں چند سال قبل لازمی ہیلتھ انشورنس کو متعارف کرایا گیا تھا اور آجر ملازمین کو ہیلتھ انشورنس کوریج فراہم کرنے کا پابند ہے۔ تاہم، اگر آجر بچوں کے لیے انشورنس فراہم نہیں کر رہا ہے، تو والدین کو ان کے لیے ہیلتھ انشورنس خریدنا پڑے گا۔
