متحدہ عرب امارات میں ماہ جولائی کے لیے پیٹرولیم مصنوعات کی قیمتوں کا اعلان کر دیا گیا۔
پیر کو متحدہ عرب امارات کی ایندھن کمیٹی نے نئی پیٹرولیم مصنوعات کی نئی سرکاری قیمت کا سرکلر جاری کر دیا۔
جولائی کے لیے، سپر 98 پیٹرول کی قیمت 2.70 درہم فی لیٹر ہوگی جو جون میں 2.58 فی لیٹر تھی جبکہ اسپیشل 95 کی قیمت 2.58 درہم فی لیٹر ہوگی جو پچھلے مہینے 2.47 فی لیٹر کے مقابلے بڑھ گئی ہے۔
اسی طرح ای پلس کیٹیگری کا پیٹرول جولائی میں 2.51 درہم فی لیٹر میں دستیاب ہوگا جو جون میں 2.39 درہم فی لیٹر تھا، جبکہ ڈیزل کی قیمت اب 2.63 درہم فی لیٹر ہوگی جو پچھلے مہینے 2.45 درہم فی لیٹر تھی۔
مشرق وسطیٰ میں بڑھنے والے تنازع سے عالمی سطح پر پیٹرولیم مصنوعات کی قیمتوں میں اضافہ ہوا ہے جس کے اثرات ماہ جولائی پر مرتب ہوئے ہیں تاہم امید کی جارہی ہے کہ اگست اور سمتبر میں قیمتوں میں کمی ہوگی۔
ادھر عالمی سطح پر تیل کی قیمتوں میں تیزی سے اضافے کے پیش نظر پاکستان میں یکم جولائی سے پیٹرول اور ڈیزل کی قیمتیں بڑھنے والی ہیں۔
حکومت کی جانب سے آج پٹرولیم مصنوعات کی نئی قیمتوں کا اعلان کیا جائے گا، جس میں پیٹرول کی قیمت میں بڑا اضافہ متوقع ہے۔
ذرائع کا کہنا ہے کہ پیٹرولیم مصنوعات 14 روپے 86 پیسے فی لٹر تک مہنگی ہونے کا امکان ہے۔
ذرائع نے بتایا کہ ہائی سپیڈ ڈیزل 14 روپے 86 پیسے فی لیٹر اور پٹرول 11 روپے 43 پیسے فی لٹر مہنگا ہوسکتا ہے۔
پٹرولیم مصنوعات کی قیمتوں کی ورکنگ آج بھیجی جائے گی ، پٹرولیم ڈویژن اور وزارت خزانہ مشاورت کے بعد وزیراعظم کو ورکنگ پیش کریں گی۔
