یو اے ای کے پہاڑوں کے درمیان موجود جھونپڑی سوشل میڈیا پر خوب وائرل ہورہی ہے، کیونکہ اس جھونپڑی سے سیاحوں کو مفت چائے کی پیشکش کی جارہی ہے، جس کی ویڈیو بھی سوشل میڈیا پر مقبولیت حاصل کررہی ہے۔
بین الاقوامی خبر رساں ادارے کی رپورٹ کے مطابق یہ جھونپڑی آنے والے سیاحوں کو مفت گرم چائے، کافی پیش کرکے دیرپا رشتہ قائم کرتی ہے۔ یہاں کی چائے اتنی مقبول ہے کہ لوگ یہاں کے مفت مشروب کا ایک گھونٹ چکھنے کے لیے سینکڑوں کلومیٹر کا سفر طے کرتے ہیں۔
یہاں کی خاصیت یہ ہے کہ کھجور کے پتوں سے بنی جھونپڑی میں بیٹھا، شخض ہر ایک کو مسکراہٹ کے ساتھ خوش آمدید کہتا ہے۔ جھونپڑی پر موجود شخص کا کہنا تھا کہ مجھے یہاں سیاحوں کو چائے اور کافی پیش کرنے اور اماراتی اسپانسر کی طرف سے مسجد کی دیکھ بھال کے لیے لایا گیا۔
مذکورہ شخص کا کہنا تھا کہ یہاں آنے والے مہمانوں میں یورپی، عرب اور ایشیائی ہیں۔ وہ میری چائے کو پسند کرتے ہیں اور میرا اور میرے اسپانسر کا شکریہ ادا کرتے ہیں۔ کارکنوں سے بھری بس ہر متبادل دن میری چائے کے لیے یہاں رکتی ہے۔
اندازاً 2,000 لوگ ہر ماہ مفت چائے سے لطف اندوز ہونے کے لیے یہاں کا رخ کرتے ہیں اور روزانہ چائے کے تقریباً 70 کے قریب کپ بناتا ہوں۔
نوجوان کا کہنا تھا کہ عرب افراد گہوا کو ترجیح دیتے ہیں، اور یورپی سلیمانی چائے پینا پسند کرتے ہیں، نوجوان نے بتایا کہ اس کی ذمہ داریوں میں شیڈ کے بالکل پیچھے ایک چھوٹی مسجد کی دیکھ بھال شامل ہے۔نوجوان نے کہا کہ مسجد میں خدمات انجام دے کر دلی سکون محسوس کرتا ہوں۔
