شیوسینا (یو بی ٹی) کے صدر ادھو ٹھاکرے نے مودی حکومت پر شدید تنقید کرتے ہوئے کہا ہے کہ مرکز میں حکمران اتحاد حال ہی میں قومی اپوزیشن جماعتوں کے اجلاس کی کامیابی سے بوکھلاہٹ کا شکار ہے۔
بین الاقوامی خبر رساں ادارے کی رپورٹ کے مطابق شیوسینا کے صدر نے کہا کہ مودی انڈیا بلاک سے اتنے پریشان ہیں کہ انہوں نے ملک کا نام بدل کر بھارت رکھ دیا ہے۔
انہوں نے کہا کہ ہم اگلے (لوک سبھا) انتخابات میں حکمران جماعت اور ملک کے وزیر اعظم کو بدل دیں گے۔ مگر ہم ملک کا نام بدلنے کے اس کھیل میں شامل نہیں ہوں گے، انہوں نے کہا کہ 2024 کے انتخابات میں بی جے پی اقتدار میں واپس نہیں آئے گی۔
ریلی سے خطاب میں ٹھاکرے کا کہنا تھا کہ ‘انڈیا’، ‘بھارت’ یا ‘ہندوستان’ سبھی ہمارے ملک کے نام ہیں اور ہم جو چاہیں استعمال کریں گے، اور کوئی بھی ہم پر ملک کا نیا نام مسلط نہیں کرسکتا۔
انہوں نے کہا کہ وہ اقتدار پر قبضہ کرنے، سیاسی پارٹیوں کو توڑنے،سمیت دیگر جماعتوں کے رہنماؤں کو پکڑنے کے لیے کسی بھی حد تک جاسکتے ہیں۔
ٹھاکرے نے افسوس کا اظہار کرتے ہوئے کہا کہ کس طرح خواتین کو سرعام بے دردی اور شرمندگی کا نشانہ بنایا گیا، ”لیکن مرکز کی حکومت نے کچھ نہیں کیا، بلکہ خاموش تماشائی بنی رہی۔
