تازہ ترین

برطانیہ: انشورنس کی رقم کیلئے بیوی کی موت کا ڈرامہ، پاکستانی کو سزا

لندن: برطانیہ میں پاکستانی نژاد برطانوی شہری نے انشورنس کی رقم ہتھیانے کے لیے بیوی کی موت کا ڈرامہ رچایا، الزام ثابت ہونے پر عدالت نے پانچ سال جیل کی سزا سنا دی۔

تفصیلات کے مطابق سید بخاری نامی پاکستانی نژاد برطانوی شہری نے بیوی کی موت کا بہانہ بنا کر انشورنس کی مد میں تقریباً 1 ملین پاؤنڈ ہتھیانے کی کوشش کی، متحرک ادارے نے تحقیقات کرکے مجرم کو جیل کی سلاخوں کے پیچھے پہنچادیا۔

غیرملکی خبررساں ادارے کے مطابق 39 سالہ پاکستانی نے فون کے ذریعے اپنی بیوی کی موت کی کہانی تیار کی، تاکہ ایک ملین کی خطیر رقم جعل سازی کے ذریعے حاصل کیا جاسکے۔ مجرم نے اس کے لیے جعلی ڈیتھ سرٹیفکیٹ سمیت دیگر دستاویزات بھی انشورنس کمپنی میں جمع کرائیں۔

لندن پولیس کا کہنا ہے کہ شہری نے پہلے ای میل کے ذریعے انشورنس کمپنی سے رابطہ کیا اور انہیں پاکستان کے شہر کراچی میں اپنی بیوی کی موت کی خبردی۔ جرم ثابت ہونے پر لندن کراؤن عدالت نے 5 سال جیل کی سزا سنائی۔

پولیس کے مطابق متعلقہ ادارے کی تحقیق سے پتا چلا شہری نے ازخود جعلی دستاویزات تیار کیں۔

متعلقہ ادارے کی جاری کردہ رپورٹ میں کہا گیا ہے کہ مجرم اس سے قبل بھی فراڈ میں ملوث رہا ہے جس کے باعث اسے 7 سال جیل کی سزا بھی ہوئی۔ بخاری نے 7 مرتبہ پاکستان اور متحدہ عرب امارات کا دورہ بھی کیا جہاں اس نے بھاری رقم خرچ کی۔

Comments

- Advertisement -