لندن: جمعہ کی رات سَنڈرلینڈ میں بدامنی پھوٹ پڑنے کے بعد مقامی پولیس کو ’’سنگین اور مسلسل تشدد‘‘ کا سامنا کرنا پڑ رہا ہے۔
بی بی سی کے مطابق شمالی مغربی انگلینڈ کے علاقے ساؤتھ پورٹ میں پیر کو چاقو زنی سے 3 کم سن لڑکیوں کی موت کے بعد برطانیہ بھر کے قصبوں اور شہروں میں ہنگامے پھوٹ پڑے ہیں، بدامنی کے تازہ واقعے میں مشتعل افراد نے پولیس اسٹیشن کو جلا دیا، جس میں تین اہلکار زخمی ہوئے۔
رپورٹس میں کہا جا رہا ہے کہ ساؤتھ پورٹ میں چاقو سے حملے کے خلاف برطانیہ میں مظاہروں کا سلسلہ بڑھ گیا ہے، سَنڈر لینڈ میں پولیس سے جھڑپوں کے بعد مشتعل ہجوم نے پولیس اسٹیشن کو جلا ڈالا، پولیس اسٹیشن میں لگنے والی آگ نے ملحقہ عمارت کو بھی لپیٹ میں لے لیا۔
مظاہرین نے پولیس اہلکاروں پر پتھراؤ کیا اور آگ بجھانے والے آلات سے بھی حملے کیے، پولیس اسٹیشن سے ملحقہ عمارت اور ایک کار بھی شعلوں کی لپیٹ میں آ گئی، دوسری جانب لیورپول میں مسجد کے باہر 2 حریف گروہوں کے درمیان جھگڑے کے بعد علاقے میں کشیدگی پھیل گئی ہے۔
نارتھمبریا پولیس کا کہنا ہے کہ پولیس کے احاطے میں توڑ پھوڑ اور ملحقہ عمارت کو آگ لگانے کے بعد 8 افراد کو گرفتار کر لیا گیا ہے۔ لیورپول میں ایک مسجد کے باہر فساد کے دوران پولیس پر بیئر کے کین اور اینٹیں پھینکی گئیں اور ایک کار کو آگ لگائی گئی۔
نارتھمبریا پولیس کی چیف سپرنٹنڈنٹ ہیلینا بیرن نے ایک بیان میں کہا کہ پرتشدد مظاہروں میں پولیس پر جو حملے ہوئے ہیں اور جو دیگر نقصان ہوا ہے اسے برداشت نہیں کیا جائے گا، مجرمانہ رویے کے ذمہ داروں کی شناخت کی جائے گی۔
