اسلام آباد: پاکستانی کمیونٹی کیخلاف برطانیہ میں نسل پرستی پرمبنی بیانات کے رجحان ہر پاکستان کی جانب سے تشویش کا اظہار کیا گیا ہے۔
تفصیلات کے مطابق ترجمان پاکستانی دفترخارجہ کا اپنے بیان میں کہنا تھا کہ پاکستان اور برطانیہ کی دوستی گرمجوشی، خیرسگالی، مضبوط تعاون اور اعتماد پر مبنی ہے، دہائیوں سے پروان چڑھنے والے تعلق کو پاکستان کی خارجہ پالیسی میں کلیدی اہمیت حاصل ہے۔
ترجمان نے کہا کہ پاک برطانیہ کثیرالجہتی تعلقات تجارت و سرمایہ کاری اور تعلیم جیسے شعبوں پر مشتمل ہیں، تعلقات سلامتی، انسداد دہشتگردی، پارلیمانی تعاون اور عوامی رابطوں جیسے شعبوں کا احاطہ کرتے ہیں۔
دفترخارجہ کے ترجمان نے مزید کہا کہ 17لاکھ نفوس پرمشتمل برطانوی پاکستانی کمیونٹی سب سے مضبوط رشتہ فراہم کرتی ہے، برطانیہ میں بڑھتے نسل پرستانہ اور اسلاموفوبک بیانات پر گہری تشویش کا اظہار کرتے ہیں۔
چند افراد کے بیان کو 17لاکھ برطانوی پاکستانی کمیونٹی کے ساتھ جوڑنے کی کوشش کی جارہی ہے، پاکستانی نژاد برطانوی شہریوں نے برطانیہ کی ترقی میں نمایاں کردار ادا کیا ہے۔
ترجمان نے کہا کہ پاکستان سے تعلق رکھنے والے بےشمار مسلم فوجیوں نے برٹش انڈین آرمی میں خدمات انجام دیں، مسلمان سپاہیوں نے عالمی جنگوں میں جمہوریت کے لیے جانیں قربان کیں، برطانوی پاکستانی برطانیہ کےصحت،ریٹیل اورخدمات کےشعبوں میں ریڑھ کی ہڈی ہیں۔
بہت سے برطانوی پاکستانی اعلیٰ عوامی عہدوں پر فائز ہیں، ہزاروں پاکستانی رکن پارلیمنٹ، میئرز، کونسلرز اور مقامی پولیس کے طور پر اپنی کمیونٹیز کی خدمت کرتے ہیں۔
ترجمان کا کہنا تھا کہ برطانوی پاکستانی کھیلوں اور فنون میں نمایاں ہیں، پاکستانی نژاد کمیونٹی کے پکوان اور موسیقی برطانوی ثقافت کو مالا مال کرتے ہیں، ایسی بڑی کمیونٹی کو چند افراد کے اعمال کی بنیاد پر بدنام کرنا قابل مذمت ہے۔
