لندن: یورپی یونین سے علیحدگی کے بعد برطانوی حکومت نے معیشت کو مستحکم رکھنے کے لیے بھارت سے تجارتی معاہدہ کرنے کا فیصلہ کرلیا، برطانوی وفد اگلے ماہ معاملات طے کرنے کے لیے ممبئی اور دہلی پہنچے گا۔
برطانوی میڈیا کے مطابق برطانوی فنانس منسٹر اعلیٰ تجارتی وفد کے ہمراہ اگلے ماہ بھارت جائیں گے اور وہاں پر مختلف بھارت کی تجارتی تنظیموں سے معاہدے کریں گے، برطانوی وفد میں بینک آف انگلینڈ کے گورنر بھی موجود ہوں گے۔
برطانوی وزیر خزانہ کے مطابق ’’یورپی یونین سے علیحدگی کے بعد معیشت کو مستحکم رکھنے کے لیے بھارت سے تجارتی معاہدہ بہت ضروری ہے تاکہ ہماری معیشت اپنی جگہ برقرار رکھ سکے، تجارتی معاہدوں سے دونوں ممالک کے روابط بھی بہتر ہوں گے‘‘۔
بھارتی میڈیا نے اگلے ہفتے برطانوی وفد کی آمد کی تصدیق کرتے ہوئے کہا ہے کہ ’’دونوں ممالک کے درمیان باہمی رضامندی کے تحت اعلیٰ تجارتی معاہدوں پر دستخط کیے جائیں گے‘‘۔
پڑھیں: ’’ وزیراعظم ڈیوڈ کیمرون کا مستعفی ہونے کا اعلان ‘‘
یاد رہے یورپین یونین سے علیحدگی کے لیے برطانوی حکومت میں ریفرنڈم کروایا تھا جس میں عوام نے بڑی تعداد میں حصہ لے کر اس اتحاد سے علیحدگی کا فیصلہ سنایا تھا، نتائج سامنے آنے کے بعد یورپی یونین سے جڑے رہنے کے خواہش مند برطانوی وزیراعظم کیمرون نے بھی اپنی نشست سے استعفیٰ دے دیا تھا۔
