برطانیہ آنے والے افراد کی تعداد کو محدود کرنے کے لیے نئے قوانین لاگو کردیئے گئے ہیں۔
برطانوی میڈیا کے مطابق اسکلڈ اور فیملی ویزا پر برطانیہ آنے والوں کے لیے کم از کم تنخواہ کی شرط میں اضافہ کردیا گیا۔
اسکلڈ ورکرز کے برطانوی ویزا کے لیے تنخواہ کی حد کو 26 ہزار 200 سے بڑھا کر 38 ہزار 700 پاؤنڈ کردیا گیا۔ کم از کم تنخواہ کی حد ہیلتھ اینڈ سوشل کیئر اور ٹیچرز وغیرہ پر لاگو نہیں ہوگی۔
فیملی ویزا کے لیے کم از کم تنخواہ کی حد کو بھی 18 ہزار 600 سے بڑھا کر 29 ہزار پاؤنڈ کردیا گیا۔ سوشل کئیر کے شعبہ میں کام کرنے والے افراد اب زیر کفالت افراد کو برطانیہ نہیں لاسکیں گے۔
اس فیملی ویزا کے لیے بھی ابتدائی طور پر تنخواہ کی حد 38 ہزار 700 پاؤنڈ مقرر کی گئی تھی۔ فیملیز کی تقسیم کے خدشے کے سبب حکومت نے کم از کم تنخواہ کی شرط پر نظرثانی کی۔
2025 تک فیملی ویزا کے لیے کم از کم تنخواہ کی حد کو پہلے 34 ہزار 500 اور پھر 38 ہزار 700 پاؤنڈ کردیا جائے گا۔
فیملی ویزا پر مقیم افراد پر ویزا کی تجدید کے وقت نئے قواعد کا اطلاق نہیں ہوگا۔
امریکا، برطانیہ اور فرانس کا رویہ منافقانہ ہے، ایران
واضح رہے کہ ہوم سیکرٹری جیمز کلیورلی کی جانب سے امیگریشن میں کمی کے لیے گزشتہ سال دسمبر میں نئے قواعد کا اعلان کیا گیا تھا، 2022 میں 74 ہزار 500 افراد کی ریکارڈ تعداد برطانیہ پہنچی تھی۔
