ماسکو: روس نے یوکرین میں شہری تنصیبات کو نشانہ بنانے کا الزام مسترد کر دیا، سفیر نے کہا کہ روس بچوں کے اسپتال پر حملے کی ذمہ داری سے انکار کرتا ہے۔
تفصیلات کے مطابق روس نے یوکرین میں شہری تنصیبات کو نشانہ بنانے کا الزام مسترد کرتے ہوئے یو این سیکریٹری جنرل کی مذمت کو دُہرا معیار قرار دے دیا۔
اقوامِ متحدہ میں روس کے مندوب واسِلے نبنزیا نے کہا کہ روس نے یوکرین میں شہری تنصیبات کو نشانہ نہیں بنایا، انتونیو گوتریس نے کیف واقعے کی مذمت کی لیکن سیوستا پول حملے پر خاموش رہے۔
یوکرین میں بچوں کا اسپتال بھی روسی میزائل حملے کی زد پر آ گیا
روسی مندوب نے دعویٰ کیا کہ کیف میں چلڈرن اسپتال کو ناروے کے دیے گئے میزائل سسٹم سے نشانہ بنایا گیا ہے، اس لیے ناروے بتائے کہ اس نے یوکرینی فوج کو کیف میں بچوں کے اسپتال کو نشانے بنانے کی اجازت دی تھی؟
روسی مندوب کے مطابق یوکرین میں حالیہ نقصان یوکرینی ایئر ڈیفنس سسٹم میزائل گرنے سے ہوا ہے۔ انھوں نے سلامتی کونسل کے سیشن کی صدارت کرتے ہوئے امریکا سمیت دیگر ممالک کی روس پر تنقید کو ’’زبانی جمناسٹک‘‘ قرار دیا، اور کہا کہ یہ یوکرین کی حکومت کو بچانے کی کوشش کر رہے ہیں۔
واضح رہے کہ امریکی سفیر لنڈا تھامس گرین فیلڈ نے کہا کہ روس سلامتی کونسل کے مستقل رکن کی حیثیت سے اس سیشن کی صدارت کر رہا ہے، جب کہ اس نے بچوں کے اسپتال پر حملہ کیا، یہ کہتے ہوئے بھی میری ریڑھ کی ہڈی میں سنسنی دوڑ جاتی ہے۔
