ٹوکیو: روس یوکرین جنگ میں جاپان نے اہم ترین فیصلہ کرلیا ہے۔
غیر ملکی میڈیا رپورٹ کے مطابق جاپان نے یوکرین کو بُلٹ پروف جیکٹس اور دیگر غیر جارحانہ کمک فراہم کرنے کا فیصلہ کیا ہے جو جاپانی سیلف ڈیفنس فورسز کی ملکیت ہیں۔
یہ فیصلہ جاپانی وزیراعظم کیشیدا فومیو نے قومی سلامتی کونسل کے اجلاس میں کیا، اجلاس میں فیصلہ کیا گیا کہ یوکرین کو انسانی بحران سے بچانے کے لئے فوری طور پر ہیلمٹ، سخت سرد موسم کا لباس، خیمے، کیمرے، حفظان صحت کی مصنوعات، ہنگامی غذائی اشیا اور پاور جنریٹر فراہم کیا جائے۔
قومی سلامتی کونسل اجلاس کے بعد چیف کابینہ سیکریٹری ماتسونو ہیروکازو نے میڈیا کو بتایا کہ بین الاقوامی برادری، یوکرین کی حمایت پر متحد ہے، انہوں نے واضح کیا کہ حکومت ایسا سامان فراہم کرنے کا کوئی ارادہ نہیں رکھتی جو کسی بھی طرح سے انسانی نقصان کا باعث بن سکتا ہو۔
واضح رہے کہ جاپانی تاریخ میں یہ پہلی بار ہوا ہے جب جاپان نے اپنی سیلف ڈیفنس فورسز کی بُلٹ پروف جیکٹس کسی دوسرے ملک کو فراہم کی ہیں، یہ اقدام یوکرین کی درخواست پر کیا گیا ہے۔
یہ بھی پڑھیں: روس : فوجیوں کی توہین اور فیک نیوز پھیلانے پر سخت سزا دینے کا قانون منظور
دوسری جانب یوکرین پر حملے کے نویں روز روس اور یوکرین میں شہریوں کو جنگ زدہ علاقوں سے نکالنے پر اتفاق ہوگیا ہے۔
روس کی جانب سے شہریوں کے انخلا کےلیے 10 بجے عارضی سیز فائر کا آغاز کیا گیا، روسی حکام کا کہنا ہے کہ سیز فائر شروع ہوتے ہی لوگ شہر ماریوپول اور وول نوواخا سے انخلا کرسکتے ہیں۔
خیال رہے کہ گزشتہ روز دونوں ممالک نے مذاکرات کے تحت متاثرہ علاقہ چھوڑنے والوں کو محفوظ راستہ دینے پر اتفاق کیا تھا۔
