واشنگٹن: امریکی وزیر خارجہ انٹونی بلنکن نے کہا ہے کہ ہر کوئی چاہتا ہے کہ یوکرین جنگ ختم ہو لیکن اس کو پائیدار شرائط پر ختم ہونا چاہیے۔
تفصیلات کے مطابق آسٹریلوی نشریاتی ادارے کو دیے گئے انٹرویو میں امریکی سیکریٹری اسٹیٹ انٹونی بلنکن نے کہا ہے کہ روسی صدر پیوٹن یوکرین جنگ میں شکست کھا چکے ہیں، صدر پیوٹن جو حاصل کرنا چاہتے ہیں وہ ان کے ہاتھ سے نکل چکا ہے۔
انھوں نے کہا پیوٹن یوکرین کو دنیا کے نقشے سے مٹانا چاہتے ہیں لیکن روس اس مقصد میں کامیاب نہیں ہوگا، ہر کوئی چاہتا ہے کہ یہ جنگ ختم ہو لیکن اس کو پائیدار شرائط پر ختم ہونا چاہیے۔
انٹونی بلنکن کا کہنا تھا کہ جی ٹوئنٹی اجلاس میں شرکت کرنے والے ممالک نے یوکرین کی سالمیت اور خود مختاری کی حمایت جاری رکھنے کا اعلان کیا ہے۔ انھوں نے کہا کہ اجلاس میں یہ بھی بالکل واضح تھا کہ روسی جارحیت کے نتائج جی 20 ممالک اور پوری ترقی پذیر دنیا میں محسوس کیے جا رہے ہیں۔
وزیر خارجہ نے یوکرین کی مدد کے لیے تقریباً 24 بلین ڈالر کی نئی فنڈنگ یوکرین ہی نہیں امریکا کے لیے بھی مفید قرار دیا، اور کہا کہ اقوام متحدہ کے چارٹر کے مطابق کوئی بڑا ملک دوسرے کی سرحدوں کو نہیں روند سکتا، اس پر حملہ نہیں کر سکتا ہے، اور نہ اس پر قبضہ کر سکتا ہے۔
