The news is by your side.

Advertisement

پاکستانی شہریوں کے انخلا میں ہر ممکن مدد کر رہے ہیں: یوکرینی سفیر

اسلام آباد: پاکستان میں تعینات یوکرین کے سفیر کا کہنا ہے کہ روسی میزائل حملوں میں 16 بچو‍ں سمیت 352 افراد ہلاک ہوچکے ہیں، پاکستانی شہریوں کے یوکرین سے انخلا میں ہر ممکن مدد کر رہے ہیں۔

تفصیلات کے مطابق اسلام آباد میں یوکرین کے سفیر نے پریس کانفرنس کرتے ہوئے کہا کہ 6 دن سے یوکرین کے تمام علاقوں پر حملے ہو رہے ہیں، روسی میزائل حملوں میں 16 بچو‍ں سمیت 352 افراد ہلاک ہوچکے ہیں۔

یوکرینی سفیر کا کہنا تھا کہ گزشتہ روز رہائشی علاقوں کو روسی راکٹ آرٹلری نے نشانہ بنایا، روسی حملوں میں اسپتالوں اور اسکولوں کو نشانہ بنایا جا رہا ہے۔

انہوں نے کہا کہ روس کے خلاف عالمی عدالت انصاف میں درخواست دی ہے، علاقائی سالمیت کے تحفظ کے لیے امداد دینے والے ممالک کے شکر گزار ہیں۔

سفیر کا کہنا تھا کہ یوکرین سے مہاجرین کی تعداد 50 لاکھ ہو سکتی ہے، سرحدوں پر تمام غیر ملکیوں کو ہر ممکن سہولت دے رہے ہیں، پاکستانی شہریوں کے یوکرین سے انخلا میں ہر ممکن مدد کر رہے ہیں۔

انہوں نے کہا کہ پاکستان اور یوکرین کے وزرائے خارجہ کشیدگی میں کمی کے لیے رابطے میں ہیں، انسانی زندگیاں اور آزادی تمام تذویراتی امور سے زیادہ اہم ہیں، معاملہ نہ روکا گیا تو تیسری عالمی جنگ کا خدشہ پیدا ہو سکتا ہے۔

سفیر نے مطالبہ کیا کہ روس پر اقتصادی پابندیاں عائد کی جائیں اور اس سے تجارت روکی جائے، امید ہے ایک دن پاکستان بھی اس قسم کے اقدامات اٹھائے گا۔

Comments

یہ بھی پڑھیں